Ադրբեջանի «վիրտուալ» քաղաքացիների ընտրությունը

Ադրբեջանական աղբյուրների հաղորդմամբ, 2019 թվականի հոկտեմբերի 1-ի դրությամբ, տարեսկզբի համեմատությամբ ԱՀ բնակչությունն ավելացել է 0,6%-ով՝ կազմելով 10044466 (տաս միլիոն քառասունչորս հազար չորս հարյուր վաթսունվեց) մարդ: Ընդ որում, քաղաքային բնակչությունը կազմում է 52,8%, գյուղականը՝ 47,2%, տղամարդիկ կազմում են բնակչության 49,9%, կանայք՝ 50,1%: Բնակչության խտությունը 1 կմ2 վրա կազմում է 116 մարդ:

Ադրբեջանական աղբյուրներն ակնհայտորեն խեղաթյուրում են իրականությունը՝ հակասելով նախկինում իրենց իսկ հրապարակած տվյալներին: Մասնավորապես, դեռևս 2019թ.-ի ապրիլի 6-ին ադրբեջանական աղբյուրները նշել էին, որ Ռաուֆ Հասանովի և Նիգյար Օջախովի ընտանիքում ծնվել է Ադրբեջանի Հանրապետության 10 մլիլիոներորդ բնակիչը: Նույնիսկ, եթե դա ընդունվի որպես ճշմարտություն, ապա ներկայիս թվաքանակը հուշում է, որ ԱՀ բնակչության աճը կազմել է ավելի քան 0,44%, այլ ոչ թե 0,6%:

«Կովկասկիյ ուզել» պարբերականը բավականին հետաքրքիր տվյալներ է բերում Ադրբեջանի բնակչության թվաքանակի կեղծման մասին, որն իրականում չի հասնում անգամ 7 միլիոնի: Ադրբեջանական իշխանությունները պաշտոնական տեղեկագրերում կեղծում են երկրից արտագաղթողների թիվը և դրան զուգահեռ արհեստականորեն հրապարակում են բնակչության ուռճացված թվաքանակ:

Այս ամենի նպատակն է միջազգային հանրության մոտ ձևավորել կարծիք Ադրբեջանի բարեկեցության և տնտեսության դինամիկ զարգացման առասպելի շուրջ: Բացի այդ, վերը նշված հանգամանքներն ուղղակիորեն կապ ունեն Ադրբեջանում նախատեսվող 2020թ. փետրվարի 9-ի արտահերթ խորհրդարանական ընտրություններին, որն հանդիսանում է երկրի ներքին քաղաքականության կարևորագույն իրադարձություն:

Իշխանությունները գործի դնելով ընտրակեղծիքների մեխանիզմները, ուռճացնելով ընտրողների քանակը, կրկին անգամ կապահովեն իշխող «Յենի Ազերբայջան» կուսակցության գերակշռող մեծամասնության մուտքը նոր ձևավորվող խորհրդարան և այդպիսով ընդդիմությանը կզրկեն ընտրություններում հավաքել անցողիկ շեմը հաղթահարելու անահրաժեշտ քանակի ընտրողների ձայները:

iPress.am