English
Русский
iPress.am -Հնդկաստանում մոտ 200 մարդ վարակվել է մուկորմիկոզ սնկային հիվանդությամբ, որն անվանում են նաև «սև բորբոս»: ՏԱՍՍ գործակալության փոխանցմամբ՝ այս մասին հայտնել է Դելի մայրաքաղաքային շրջանի (որում ընդգրկված է Նյու Դելին) առողջապահության նախարար Սատենդար Ջայնը:
«Քաղաքում արդեն գրանցվել է «սև բորբոսով» վարակվելու 197 դեպք»: Նախկինում տարվա կտրվածքով հայտնի էր դառնում 30-50 նման դեպքի մասին, այժմ թվերը բավականին արագ են աճում»,- հայտնել է պաշտոնյան: Նրա խոսքով՝ 8-10 մասնավոր և 3 պետական հիվանդանոցներ բուժում են սնկային հիվանդությամբ վարակվածներին:
Մասնագետը հայտնել է հիվանդության բուժման համար անհրաժեշտ դեղամիջոցների, մասնավորապես՝ ամֆոտերիցինի սակավության մասին:
Բժիշկների խոսքով՝ մուկորմիկոզ ախտորոշվում է կորոնավիրուսով վարակված այն հիվանդների մոտ, որոնք գտնվել են վերակենդանացման բաժանմունքում և երկար ժամանակ թթվածին ու ստերոիդներ են ստացել:
Մուկորմիկոզով վարակման դեպքեր են գրանցվել Նյու Դելիում, Ռաջաստան, Թելանգանա, Մահարաշտրա, Կարնատակա, Ուտարկհանդ, Մադհյա Պրադեշ նահանգներում: Տեղի ԶԼՄ-ների տվյալներով՝ առնվազն 7250 մարդ երկրում վարակված է այդ սնկային հիվանդությամբ:
