Հայտնաբերվել է Ալցհեյմերի հիվանդության անսպասելի պատճառ

Բերանի խոռոչի անբավարար հիգիենան կարող է հանգեցնել բազմաթիվ հիվանդությունների, այդ թվում՝ էրեկտիլ դիսֆունկցիայի, 2-րդ տիպի շաքարախտի և նույնիսկ Ալցհեյմերի հիվանդության: Այս մասին հայտնում է The Times-ը՝ հղում կատարելով գիտնականների բացահայտումներին։

Համաձայն Alzheimer’s Research UK բարեգործական կազմակերպության՝ լնդերի հիվանդություն առաջացնող բակտերիաները կարող են ներթափանցել ուղեղ և ոչնչացնել նեյրոնները, ինչը նշանակում է, որ դրանք կարող են առաջացնել դեմենցիա: Այս միկրոօրգանիզմները վնասում են նաև սրտանոթային համակարգը։

«Մասնագետները վաղուց կապ են հաստատել բերանի խոռոչի բորբոքման և լուրջ հիվանդությունների զարգացման միջև»,- ասել է ատամնաբույժ Վիկտորիա Սամպսոնը՝ հավելելով, որ գիտնականները նաև կապ են հայտնաբերել բերանի խոռոչի հիվանդությունների և կոլոռեկտալ քաղցկեղի միջև։

Վտանգավոր հիվանդությունների առաջացման վտանգը նվազեցնելու համար հարկավոր է պարբերաբար և պատշաճ կերպով հոգ տանել բերանի խոռոչի մասին, ասվում է նյութում։