ՌԴ վիրուսաբանության և բիոտեխնոլոգիայի «Վեկտոր» կենտրոնի տնօրեն Ռինատ Մակսյուտովը Վլադիմիր Պուտինի հետ խորհրդակցության ժամանակ տեղեկացրել է, որ երկու դեղամիջոց նախնական դրական արդյունք են տվել նոր տեսակի կորոնավիրուսի բուժման հարցում:
Ինչպես փոխանցում է РИА Новости-ն, վերջինս մասնավորեցրել է, որ իրենք նման արդյունք են ստացել ավելի քան 30 հակավիրուսային դեղամիջոցներ ուսումնասիրելուց հետո:
Մակսյուտովն ընդգծել է, որ հատուկ հակավիրուսային ազդեցության դեղամիջոցների ընտրությունն իրականացվել է աշխարհում կլինիկական հետազոտություններից ստացված տվյալների բիոտեղեկատվական ուսումնասիրության հիման վրա:
Կենտրոնի ղեկավարը նշել է նաև, որ ՌԴ Գիտությունների ակադեմիայի սիբիրյան մասնաճյուղի հետ միասին սկսել են 22 նոր դեղամիջոցի հետազոտություն իրականացնել՝ նոր կորոնավիրուսի դեմ դեղամիջոց հայտնաբերելու նպատակով: Հետազոտությունները կավարտվեն ապրիլի 10-ին: Մասնագետի խոսքով՝ թեստավորման երկրորդ փուլը կավարտվի մինչև ապրիլի 30-ը:
Ռուսաստանում կորոնավիրուսով վարակման 7497 դեպք է հայտնաբերվել, որոնցից 5181-ը՝ Մոսկվայում, 58 մարդ մահացել է, 494-ն՝ ապաքինվել:
English
Русский
