Նոր տեսակի կորոնավիրուսից ապաքինված յուրաքանչյուր երրորդ հիվանդ հետագա ամբողջ կյանքի ընթացքում կարող է տառապել թոքերի վնասվածքից, քրոնիկ հոգնածությունից և հոգեբանական այլ խանգարումներից. նման եզրակացության են եկել Մեծ Բրիտանիայի Առողջապահության ազգային ծառայության մասնագետները, գրում է The Daily Telegraph-ը։
Հետազոտության տվյալների համաձայն՝ կորոնավիրուսի հարուցիչով պայմանավորված հիվանդությունը հաղթահարածների 30 տոկոսի մոտ հետագայում կարող է թոքերի ֆիբրոզ առաջանալ․ սա հիվանդություն է, որի պարագայում թոքերում հատուկ հյուսվածքներ են առաջանում, որոնք հանգեցնում են շնչառական գործառույթի խանգարմանը և արյունը թթվածնով հարստացնելու գործընթացի վատացմանը։
Ապաքինվածների կեսի մոտ կարող են ֆիզիկական, կոգնիտիվ և հոգեբանական խանգարումներ առաջանալ։ Նշվում է նաև, որ յուրաքանչյուր տասներորդ հիվանդի մոտ սրտի հետ կապված խնդիրներ կարող են ի հայտ գալ։
Գիտնականների կարծիքով՝ կորոնավիրուսը կարող է նաև ուղեղի գործառույթների վրա ազդեցություն ունենալ՝ հետագայում նաև Ալցհեյմերի հիվանդության հանգեցնելով։
English
Русский
