iPress.am-Գերմանացի գիտնականները պարզել են, որ ակտիվ սեռական կյանքը կարող է դառնալ գլխացավի դեմ պայքարի արդյունավետ միջոց, ուստի գլխացավը չպետք է դառնա սեքսից հրաժարվելու պատճառ։
Tert.am Medicine-ն այս պնդման շուրջ զրուցել է Հայ-ամերիկյան առողջության կենտրոնի սեքսոպաթոլոգ, բ.գ.թ., դոցենտ Սևադա Հակոբյանի հետ՝ փորձելով պարզել՝ արդյոք կարող է սեռական ակտը նման դրական ազդեցություն ունենալ և ինչով է դա պայմանավորված։
Բժիշկ Հակոբյանի խոսքով՝ հետազոտությունները փաստում են, որ գլխացավի պահին սեքսով զբաղվողների կեսից ավելիի մոտ միգրենի դրսևորումները մեղմվում են։
«Յուրաքանչյուր 5-րդի մոտ գլխացավերն առհասարակ անհետացել են, իսկ ոմանք այն կիրառել են որպես ցավազրկող միջոց», - նշում է մասնագետը՝ ևս մեկ անգամ շեշտելով, որ այս հետազոտություններն ապացուցում են՝ գլխացավերն ամենևին սեքսից հրաժարվելու պատճառ չպետք է դառնան։
«Պարզվել է, որ հետազոտվողների ⅓-ը միգրենի ցավերի ժամանակ սեքսով է զբաղվել, իսկ նրանց ⅔-ը փաստել է, որ գլխացավերի ակնհայտ թեթևացում են զգացել», – նշում է մասնագետը։
Ինչպես բացատրում է բժիշկը՝ վկայակոչելով հետազոտողներին, սեռական ակտի ցավազրկող ազդեցությունը կարող է պայմանավորված լինել մեծ քանակությամբ էնդորֆին հորմոնի արտադրությամբ, որը խթանում է հաճույքի զգայարաններն ու միևնույն ժամանակ անէսթետիկ (ցավազրկող) ազդեցություն է ունենում։
«Դա համարվում է բնական ցավազրկող, որի մակարդակն ավելանում է և մեղմում գլխացավերը», – եզրափակում է բժիշկը։