Ինչպես է հոտի կորուստը ազդում սեռական առողջության վրա

Ինչպես է հոտի կորուստը ազդում սեռական առողջության վրա։ Այս թեմայով Tert.am-ը զրուցել է Հայ Ամերիկյան Առողջության Կենտրոնի սեքսոպաթոլոգ, դոցենտ Սևադա Հակոբյանի հետ և փորձել պարզել, թե արդյո՞ք հոտի զգացողությունը ազդում է մարդու սեռական ֆունկցիայի վրա: 

Հոտի զգացողությունը ազդեցիկ դեր ունի մարդկային հարաբերություններում՝ ներառյալ սեռական հարաբերությունները։ Գիտնականները պնդում են, որ մարդը կարող է տարբերակել մոտավորապես 1 տրիլիոն տարբեր բույրեր, որը շատ ավելի է, քան գույների քանակը, որը կարող ենք տեսնել և ձայները, որ կարող ենք լսել: Հետազոտողները ենթադրում են, որ մարդու մարմնի հոտը կարող է տեղեկություն տրամադրել նրա տարիքի, սեռի և սեռական կողմնորոշման վերաբերյալ։ Այն կարող է նաև օգնել մարդկանց հաղորդել սեռական ազդանշաններ։

Biological Psychology ամսագրում տպագրված ուսումնասիրության մեջ քննարկվում է տղամարդու սեռական արձագանքը կնոջ քրտնարտադրությանը՝ դաշտանային ցիկլի ֆոլիկուլյար (առաջին փուլ) և լյուտեինալ (երկրորդ փուլ) փուլերի ընթացքում։ Հետազոտողները բացահայտել են, որ տղամարդը սեռականորեն ավելի մեծ գրգռվածություն է զգում, երբ զգում է կնոջ հոտը, որը կուտակվել է ֆոլիկուլյար փուլի ընթացքում, քան լյուտեինալի: Գիտնականներն առաջարկում են մեկ այլ կապ հոտի զգացողության և սեռական ցանկության միջև։ Նրանք աշխատում էին 100 հոգուց բաղկացած խմբի հետ, որը կորցրել էր հոտի զգացողությունը։

Հետազոտվողների 59 %-ն ասաց, որ իրենք ունեն ցածր սեռական ցանկություն և որ այն սկսել է նվազել հոտի զգացողությունը կորցնելու հետ միաժամանակ։

Այսպիսով՝ հոտառության և սեռական ցանկության կապը ակնհայտ է և իր մոգական ազդեցությունն է թողնում մարդու սեքսուալության վրա: