Երեկ մենք իրականացրել ենք 236 թեստ, որից դրական է 28-ը, սա նշանակում է, որ մենք շարունակում ենք պահպանել շաբաթվա սկզբում արձանագրված զգուշավոր լավատեսությունը, մանավանդ, որ նոր բուժվածների թիվը 24 է: Այս մասին, այսօր՝ ապրիլի 9-ին, կառավարության նիստի ժամանակ նշեց ՀՀ վարչապետ Նիկոլ Փաշինյանը:
Նա պարզաբանեց, թե այդ իօնչպես է ստացվել, որ պաշտոնապես հայտարարվել է 40 նոր դեպքի մասին, իսկ ինքը նշեց 28 թիվը. «Վերջին մեկ շաբաթվա ընթացքում այս թեմային վերաբերող ամբողջ տեղեկատվությունն ինտեգրել ենք, ստեղծել ենք թվային համակարգ, որտեղ օնլայն թարմացվում են տվյալները:
Այս ճշգրտումների ընթացքում հայտնաբերել ենք 12 անճշտություն: Իհարկե, եւս մեկ անգամ դրանք կստուգվեն: Հետեւաբար, պետք է արձանագրենք, որ վարակի մեկնարկից ի վեր Հայաստանում արձանագրվել է կորոնավիրուսի 921 դեպք: Առանց այդ 12-ի հաշվառման կլիներ 909 դեպք: Այպիսի անճշտությունները հնարավոր են, որովհետեւ դա կապված է լինում մի հիվանդին մյուս հիվանդանոց տեղափոխելու հետ, հիվանդանոցից դուրս գրվելու եւ այլ տեղ չգրանցվելու հետ»:
Ըստ Վարչապետի՝ առաջիկայում սպասվում է բուժվածների թվի որոշակի աճ, նաև մեկուսացումից դուրս եկած քաղաքացիների որոշակի աճ:
«Վաղը պարետատանը կքննարկենք մեր հետագա անելիքները, թե երկուշաբթի օրվանից ինչ կարգավարումներ պիտի գործեն, բայց այս պահին մեր ամենամեծ մարտահրավերը այն է, որ վաղվանից արդեն պետք է ստեղծենք օրական հազար թեստի հնարավորություն:
Այսօր խորհրդակցություն ենք ունեցել եւ նախարարը պարզաբանել է, որ այս համատեքստում ինչ պետք է անենք: Առաջին փուլում հնարավոր է թեստերի թիվը հազարի չհասնի, որովհետեւ եկանք եզրակացության, որ պետք է ցուցում լինի: Այսինքն մարդկանց առանց որեւէ չափանիշի հրավիրել ու թեստավորել, դա ուղղակի կլինի ժամանակի եւ ռեսուրսի անիմաստ կորուստ:
Վաղվանից մենք ցուցումով մարդկանց, մասնավորապես, բոլոր բուժաշխատողներին, թոքաբորբով հիվանդներին, ենթադրում եմ, այլ վիրուսային հիվանդություններ ունեցող մեր քաղաքացիներին պարտադիր կթեստավորենք եւ դրա արդյունքներով ավելի ամբողջական պատկերացում կկազմենք ընթացիկ իրավիճակի մասին: Վերջին օրերի տվյալներով մենք ընդհանուր առմամբ արդեն տիրապետում ենք իրավիճակին եւ պարզ է մոտավորապես, թե ինչ է կատարվում»,-ասաց նա:
English
Русский
