Մարդկությանը սպառնում են հազարավոր նոր վտանգավոր վիրուսներ. գիտնականներ

Մինչև 2070 թվականը Երկրի վրա կլիմայի փոփոխության պատճառով կարող են հայտնվել մարդկանց համար վտանգավոր հազարավոր նոր վիրուսներ: Նման ճակատագիր մարդկության համար կանխատեսել են ԱՄՆ-ի Ջորջթաունի համալսարանի գիտնականներն իրենց ուսումնասիրության մեջ, որոնցից հատվածներ մեջբերում է Associated Press-ը։

Կենսաբաններն ուսումնասիրել են երեք հազար տեսակի կաթնասունների միգրացիան և վիրուսների փոխանակումը, եթե առաջիկա 50 տարում գլոբալ միջին ջերմաստիճանը բարձրանա երկու աստիճանով:

Գիտնականները պարզաբանել են, որ ոչ բոլոր վիրուսները կարող են հանգեցնել նույն մասշտաբի համաճարակների, ինչ COVID-19-ը, սակայն  կենդանիների միջտեսակային հիվանդությունների թիվը մեծացնում է  դրանցից մարդկանց փոխանցման վտանգը։ Կլիմայագետներն ու վարակաբանները համաձայնել են, որ գլոբալ տաքացումը վտանգ է ներկայացնում մարդու առողջության համար:

Ըստ Ջարոն Բրաունի՝ Grassroots Global Justice Alliance կլիմայի փոփոխությունների դիտարկման  ասոցիացիայի ղեկավարի, Աֆրիկայում և Ասիայում մարդիկ ամենաշատը կտուժեն մահացու հիվանդություններից: Երկու տարածաշրջաններում էլ, ըստ փորձագետի, մի քանի տասնամյակ շարունակ եղել են ՄԻԱՎ-ի, Էբոլայի և այլ լուրջ հիվանդությունների օջախներ։

Որոշ երկրներում գլոբալ տաքացման պատճառով մահացու հիվանդություններն արդեն հաճախակիացել են։ Օրինակ, Ավստրալիայում  բռնկվել է ճապոնական էնցեֆալիտը: Համաճարակը ընդգրկել է չորս նահանգ՝ Քվինսլենդը, Նոր Հարավային Ուելսը, Վիկտորիան և Հարավային Ավստրալիան: Գրեթե ամբողջ երկրի կլիմային բնորոշ չէ արևադարձային հիվանդության տարածումը, այնպես որ իշխանությունները և  բնակչությունը պատրաստ չէին այդ հիվանդության տարածմանը: