English
Русский
Կապիկի ծաղիկի վարակի առաջին դեպքերն են հայտնաբերվել Ուելսում և Հյուսիսային Իռլանդիայում։ Մեծ Բրիտանիայում վիրուսով վարակվածների ընդհանուր թիվը հասել է մոտ 80-ի, փոխանցում է Interfax գործակալությունը։
Միևնույն ժամանակ Իսպանիայի առողջապահական ծառայությունները հայտարարել են երկրում կապիկի ծաղիկի 25 նոր դեպքի մասին։ Պորտուգալիայում գրանցվել է վարակի ևս ինը դեպք՝ ընդհանուր թիվը հասցնելով 58-ի:
Առողջապահական ծառայություններն ուսումնասիրում են այս վարակի դեմ պատվաստման հնարավորությունը, մասնավորապես՝ բուժանձնակազմին:
Այս շաբաթվա սկզբին կապիկի ծաղիկի առաջին դեպքերն են հաստատվել նաև Չեխիայում, Սլովենիայում և ԱՄԷ-ում:
Կապիկի ծաղիկը հազվադեպ վիրուսային վարակ է, որը փոխանցվում է նաև մարդուց մարդուն: Սովորաբար այն թեթև հիվանդություն է, և մարդկանց մեծամասնությունը վերականգնվում է մի քանի շաբաթվա ընթացքում, սակայն ոմանց մոտ կարող են բարդություններ առաջանալ: Կապիկի ծաղիկի սկզբնական ախտանշանները ներառում են ջերմություն, գլխացավ, մկանային ցավ, մեջքի ցավ, այտուցված ավշային հանգույցներ, դող և հյուծվածություն: Կարող է առաջանալ ցան, հաճախ սկսվում է դեմքի վրա և այնուհետև տարածվում մարմնի այլ մասերում։
