Կորոնավիրուսով վարակված երեխայի ուսուցիչները, դասընկերները մեկուսացված են. մանրամասներ

Կորոնավիրուսով վարակված երեխան Էջմիածնի թիվ 4 դպրոցի երրորդ դասարանում է սովորում. մեկուսացվել են նրա դասընկերները և 5 ուսուցիչ. Sputnik Արմենիայի հետ զրույցում տեղեկությունը հաղորդեց դպրոցի տնօրեն Արուսյակ Մուրադյանը։

«Ընդհանուր առմամբ մեկուսացվել է 65 մարդ՝ 5 ուսուցիչ, 27 աշակերտ, նրանց ծնողներն ու որոշ ընտանիքների անչափահաս երեխաները։ Չորս ծնող հրաժարվել են իրենց երեխաներին մեկուսացնելուց»,-ասաց տնօրենը։

Մուրադյանի խոսքով՝ արդեն իսկ թեստավորել են կորոնավիրուս ախտորոշված աշակերտի կողքի նստողին, և վերջինիս թեստը եղել է բացասական։

Դասարանում, որտեղ սովորել է վարակակիրը, 35 աշակերտ կա, որից երկուսը ջրծաղիկով են վարակված եղել և այդ օրերին դասի չեն հաճախել։

Տնօրենը հայտնեց՝ նշանադրությանը մասնակցելուց հետո երեխան նախորդ շաբաթ երկու օր ՝ երկուշաբթի և երեքշաբթի հաճախել է դպրոց։