Հայտնաբերվել է անհետ կորած համարվող հաղորդավարի մարմինը

Հինգ օր առաջ հունական Սիմի կղզում անհետացած BBC-ի հաղորդավար Մայքլ Մոսլին մահացած է հայտնաբերվել։ Այս մասին հայտնում է newsbomb.gr տեղեկատվական պորտալը։

67-ամյա հաղորդավարի մարմինը հայտնաբերվել է ափից 10 մետր հեռավորության վրա գտնվող արգելապատնեշի մոտ։ Մահը հաստատել են ոստիկանությունից։

Proto Thema թերթը պարզաբանում է, որ դիակը նկատել են ծովից։ Սիմիի քաղաքապետ Լեֆտերիս Պապակալոդուկասը լրագրողների հետ նավ է նստել՝ ցույց տալու նրանց կղզու վտանգավոր վայրերը։ Նրանք մահացած հաղորդավարի մարմինը նկատել են այդ վայրերում նկարահանումների ժամանակ։

Հունիսի 5-ին Մոսլին ընտանիքի և մի քանի ծանոթների հետ գնացել է լողալու դժվարամատչելի լողափում, իսկ հետո, հոգնածության պատճառաբանությամբ, որոշել է ոտքով այնտեղից տուն վերադառնալ։ Մյուսները կեսօրին նավակով են վերադարձել։ Երբ տղամարդուն տանը չեն գտել, սկսել են փնտրել նրան։

Ոստիկանությունը և առափնյա պահպանության աշխատակիցները, օգտագործելով ուղղաթիռ և անօդաչու թռչող սարք, այս օրերին կղզում փնտրում էին հետքեր, որոնք կարող էին օգնել գտնել կորած հաղորդավարին։ Նա իր մոտ բջջային հեռախոս չի ունեցել, ուստի հնարավոր չի եղել հետևել Մոսլիի վերջին տեղաշարժերին։ Սիմիում նաև ջրասուզակներ են աշխատել՝ որոնումներ իրականացնելով կղզու ջրերում։