«Ամսվա կեսը փող ենք հավաքում․ ամսական 100-ից 150․000 դրամ գալիս ա»․ ծնողն ահազանգում է դպրոցում տեղի ունեցող դրամահավաքության մասին

Iravaban.net-ն ահազանգ է ստացել Երևանի Մ․ Մելքոնյանի անվան համար 11 հիմնական դպրոցի աշակերտներից մեկի ծնողից՝ դպրոցում տեղի ունեցող դրամահավաքության, դասերից հետո և դասերից առաջ երեխաներին մաքրություն անելուն պարտադրելու վերաբերյալ։

Ահազանգողը նշել է, որ իր երեխան 4 տարի է՝ սովորում է այդ դպրոցում, 4 տարի էլ այդ նույն խնդիրն առկա է։ Նա չցանկացավ, որպեսզի իր անունը հրապարակվի, քանի որ հետագայում կարող են բացասական հետևանքներ լինել իր երեխայի համար։

Նա նշեց, որ հիմնականում դասղեկի ու ծնողկոմիտեի որոշմամբ է տեղի ունենում դրամահավաքությունը․ «3 երեխա ունեմ, իմաստ չունի այդքան դպրոցին գումար տալը, եթե էդպես ա՝ ես կտանեմ վճարովի դպրոց։ Գալիս ա ամսական 100-ից 150․000 դրամ ու անիմաստ»։

Ըստ ահազանգողի հայտնած տեղեկության՝ դասղեկի ծննդյան օրվա համար յուրաքանչյուրը 3000 դրամ գումար է հավաքել, դրամահավաքության մյուս դեպքերը եղել են տնօրենի, փոխտնօրենի, տարբեր առարկաների ուսուցիչների համար։  Նրա խոսքով՝ շատ-շատ են նման դեպքեր լինում, այնպես չէ, որ մի անգամ, երկու անգամ է, որ ասեն՝ ոչինչ․ «Ամսվա կեսը փող ենք հավաքում»։

Դպրոցում առկա մյուս խնդիրը աշակերտներին տրված հանձնարարություններն են՝ կապված դասարանի մաքրության հետ, մասնավորապես՝ աշակերտներին ասում են «առավոտյան շուտ եկեք, որպեսզի սեղանները մաքրեք, դասերից հետո ուշ գնացեք, որ դասարանները մաքրեք»։

«Հավաքարար կոչվածը չկա՞, որ երեխեքը պետք ա անեն։ Հա, համաձայն եմ, երեխայա, թող իրա սեղանը մաքրի, բայց ինչի՞ ամբողջ դասարանը, հավաքարար գոյություն չունի՞» , – նշում է մեր զրուցակիցը։

Ահազանգողը հայտնեց նաև, որ այսքան ժամանակ խնդրի մասին երբեք չեն բարձրաձայնել, նոր են ուզում խոսել դրա վերաբերյալ, ծնողները մտածել են՝ ամոթ է։

Կրթության որակի վերաբերյալ տրված հարցին մեր զրուցակիցը պատասխանեց՝ երեխային բարձր են գնահատում, եթե վերջինս հավելյալ գումար է վճարում ու պարապմունքների հաճախում․ «Կոնկրետ էս ամիս երեխայիս պարապմունքից հանել եմ․ ուսուցիչը, եթե պարապում ա իմ էրեխու հետ, առանձին գումար եմ տալիս դրա համար, ինքը իմ էրեխու գնահատականը բարձր ա դնում, բայց իմ էրեխու գլուխը դատարկ է մնում, էրեխեն բան չի սովորում, բայց բարձր ա դնում գնահատականը»։

Նշում է՝ հիմա պարապմունքից հանել են երեխային, ու ուսուցիչը վատ է տրամադրվել նրա հանդեպ։ Վերջին դրամահավաքությունը կազմակերպվել է Մարտի 8-ի համար․ յուրաքանչյուր երեխայի համար 2000 դրամ է պահանջվել։ 

Շրջանառվող լուրերի, ինչպես նաև խնդրի պարզաբանման նպատակով Iravaban.net-ը շուրջ 10 օր է՝ փորձում է կապվել դպրոցի տնօրենի հետ։ Հրապարակված հեռախոսամարին ընդամենը մի քանի անգամ են պատասխանել, իմացել են, որ լրագրող է զանգում, խնդրել են համար փոխանցել հետզանգի համար, քանի որ տնօրենը տեղում չի եղել։ Դպրոցից այդպես էլ չեն կապվել խմբագրության հետ։ 

Iravaban.net-ը փորձել է դպրոցի տնօրենի հետ կապվել ինչպես առավոտյան ժամերին, այնպես էլ կեսօրից հետո, ընդմիջումների ժամերին։ Այն օրերին, երբ դպրոցից պատասխանել են մեր զանգերին, նշվել է, որ տնօրենը դպրոցում չէ։