Խոշոր ավտովթար Կոտայքի մարզում

Այսօր՝ ապրիլի 22-ին, ավտովթար է տեղի ունեցել Կոտայքի մարզում: Ժամը 11:00-ի սահմաններում Աբովյան քաղաքի Զորավար Անդրանիկի պողոտայում բախվել են Կոտայքի մարզի բնակիչ 36-ամյա Գևորգ Գևորգյանի վարած «ՎԱԶ 2121» մակնիշի՝ «21DI221» համարանիշի և Գեղարքունիքի մարզի բնակիչ 87-ամյա Արկադի Ստեփանյանի վարած «ՎԱԶ 2121» մակնիշի «34QL834» համարանիշի ատոմեքենաները:

Ինչպես դեպքի վայրից հայտնում է ֆոտոլագրող Գագիկ Շամշյանը, վթարի հետևանքով 1 հոգի տեղափոխվել է հիվանդանոց, իսկ Գ. Գևորգյանը ավտոմեքենայով բախվել է ծառին և մասամբ հայտնվել ճանապարհի մեջտեղում:

Օպերատիվորեն դեպքի վայր են ժամանել ՀՀ ներքին գործերի նախարարության ոստիկանության Պարեկային ծառայության Կոտայքի մարզի գումարտակի 2-րդ վաշտի պարեկները՝ գումարտակի հրամանատարի տեղակալ Լևոն Բադալյանի, գումարտակի ծառայության ավագ տեսուչ Արտակ Ասատրյանի, գումարտակի ծառայության տեսուչ Կառլեն Բաղյանի գլխավորությամբ:  

Տարածքը սահմանազատել են պարեկները:

Վթարի փաստով ՊԾ Կոտայքի մարզի գումարտակում փաստաթղթեր են ձևակերպվում և հնարավոր է այն փոխանցվի ՀՀ քննչական կոմիտեի Կոտայքի մարզային քննչական վարչության Աբովյանի քննչական բաժին: