Երեկ ուշ երեկոյան քաղաքագետ Ալեն Ղևոնդյանը ֆեյսբուքահայությանը բառի ամենաուղիղ իմաստով դիվադադար արեց իր գրառումով.
«Անասունը պայմանագիրը ստորագրեց։ Վերջ։ Խոսքը հայ-ադրբեջանական «խաղաղության» պայմանագրի մասին է: Այսքանը: Թե ինչ տեքստ է, որ տարբերակը և ինչ կա մեջը, դեռ պարզ չէ: Էսքանը»- , գրել էր նա:
Ինչ խոսք, Հայաստանի գործող իշխանություններից, հատկապես` Նիկոլ Փաշինյանից հերթական կապիտուլյացիոն ակտը ստորագրելն ավելի քան սպասելի է, սակայն նման գրառում կատարել, հատկապես այն դեպքում, երբ դեռ որևէ փաստաթուղթ չի ստորագրվել, ի վերջո` ապատեղեկատվություն տարածել նման կարևոր հարցի վերաբերյալ, որը հերթական անգամ հանրությանը սթրեսի մեջ կգցի, լավ բան չէ: Միայն այն իմաստով, որ հետագայում` երբ այդ չարաբաստիկ փաստաթուղթը ստորագրվի եւ դրա մասին լուր ստանանք, մարդիկ այլեւս չեն հավատա դրա իսկությանը: Եւ դա կարող է սպառնալիք դառնալ մեր հասարակության համար:
Թե ինչու է քաղաքագետ Ալեն Ղևոնդյանը նման գրառում կատարել եւ ինչ աղբյուրից է այդ տեղեկությունը ստացել, փորձեցինք պարզել հենց իրենից: Նա նշեց.
«Նախ ես հարցազրույցներ չեմ տալիս, բայց կասեմ, որ ես անձնական գրառում եմ արել, հանրությունը ոնց ուզում ա, թող արձագանքի, ես այդ գրառան համար պատասխանատու եմ: Լավ գիտեմ, թե ինչ եմ անում: Բնականաբար ուշադրության խնդիր բան, նման բաներ չկան, գրառմանը կարող են մարդիկ վերաբերվել այնպես, ինչպես ցանկանում են, կարող են համադրել, որ տարբեր մեդիաշրջանակներ որոշակի բնույթի ինֆոներ արդեն իսկ ի հայտ են բերել: Հավելյալ մեկնաբանելու կարիք չկա», - Hraparak.am-ի հետ զրույցում ասաց քաղաքագետը` չցանկանալով այլ հարցերի պատասխանել:
English
Русский
