Արմավիրի մարզում ավտովթար է տեղի ունեցել

Այսօր՝ հուլիսի 30-ին, խոշոր ավտովթար է տեղի ունեցել Արմավիրի մարզում։ Ժամը 10։30-ի սահմաններում Երևան-Արմավիր ավտոճանապարհի «M-5» 26 կմ հատվածում բախվել են Արմավիրի մարզի բնակիչներ 23-ամյա Կարեն Մուշեղյանի վարած «Լադա» մակնիշի և 36-ամյա Վահե Սողոմոնյանի վարած «Lexus» մակնիշի ավտոմեքենաները։

Ինչպես դեպքի վայրից հայտնում է ֆոտոլրագրող Գագիկ Շամշյանը, բախման հետևանքով «Lexus»-ը դուրս է եկել երթևեկելի գոտուց և հայտնվել դաշտում, 1 հոգի էլ մարմնական վնասվածքներով տեղափոխվել է Վաղարշապատի բժշկական կենտրոն։

Վթարի փաստով Վաղարշապատի քննչական բաժնում նախաձեռնվել է քրեական վարույթ, որտեղ էլ պարզվում են վիրավորի ինքնությունը։

Քննիչի հանձնարարականով ավտոմեքենաները տեղափոխվում են ոստիկանության Վաղարշապատի բաժնի պահպանվող հատուկ տարածք։