ՄԱԿ-ի գլխավոր քարտուղար Անտոնիո Գուտերեշը նախազգուշացրել է, որ կորոնավիրուսային համավարակի ֆոնին դպրոցների համատարած փակման հետևանքով աշխարհը բախվում է «սերնդային աղետի» խնդրին: Նա ընդգծել է, որ աշակերտներին և ուսանողներին ապահով դասասենյակներ վերադարձնելը պետք է լինի թիվ մեկ առաջնահերթությունը:
Ինչպես նշում է The Guardian-ը, ՄԱԿ-ի գլխավոր քարտուղարն ասել է, որ հուլիսի կեսի դրությամբ դպրոցները փակ են եղել աշխարհի մոտ 160 երկրում, ինչն անդրադարձել է ավելի քան մեկ միլիարդ աշակերտի վրա, մինչդեռ առնվազն 40 մլն երեխա չի հաճախել նախադպրոցական ուսումնական հաստատություններ:
Գուտերեշն այս մասին նշել է տեսաուղերձի ժամանակ՝ ընդգծելով, որ նախքան համավարակն ամբողջ աշխարհում ավելի քան 250 մլն երեխա զրկված էր դպրոց հաճախելու հնարավորությունից:
«Հիմա մենք կանգնած ենք սերնդային աղետի առաջ, որը կարող է ի չիք դարձնել մարդկային դեռևս անհայտ ներուժը՝ վտանգելով տասնամյակների առաջընթացն ու խորացնելով արմատավորված անհավասարությունը: Հենց որ կորոնավիրուսի տարածումը վերահսկելի դառնա, աշակերտներին և ուսանողներին հնարավորինս արագ դպրոցներ ու կրթական այլ հաստատություններ ապահով վերադարձնելը պետք է թիվ մեկ առաջնահերթությունը լինի»,-նշել է Գուտերեշը:
English
Русский
