«Հանրապետական» կուսակցության փոխնախագահ Արմեն Աշոտյանն արձագանքել է վարչապետ Նիկոլ Փաշինյանի գրառմանը, որով վերջինս քաղաքական ուժերին հրավիրել է խորհրդակցությունների՝ 2021-ին արտահերթ խորհրդարական ընտրություններ անցկացնելու հարցով։
«Ուզում է ժողովրդի ձեռքերով մաքրվի դավաճանի, մարդասպանի, հայրենասպանի, հողատուի ու վիժվածքի պիտակներից։
Ուզում է լեգիտիմացնի իր գործարքն Ալիևի հետ։
Ուզում է պատմության մեջ ամրագրի ազգս կոտրելու փաստը։
Ուզում է Հայաստանը շղթայակցված պահի թուրք-ադրբեջանական ճիրաններում։
Ուզում է վերջնականապես ձեռքերը լվա Արցախից» , - գրել է Արմեն Աշոտյանը։
Հիշեցնենք՝ վարչապետն այսօր ֆեյսբուքյան գրառմամբ հայտարարել էր, թե պատրաստ է թողնել վարչապետի պաշտոնը՝ նշելով նաև, թե որ դեպքում։
«Պատրաստ եմ ժողովրդի որոշման արդյունքում թողնել վարչապետի պաշտոնը։ Եվ վարչապետի պաշտոնը կարող եմ թողնել միայն ժողովրդի որոշմամբ։
Նաև պատրաստ եմ ժողովրդի վստահության վերահաստատման դեպքում հետագայում էլ շարունակել Հայաստանի Հանրապետության առաջնորդությունը՝ այս դժվարին ժամանակներում։
Այս բոլոր հարցադրումների պատասխանը ստանալու միայն մի տարբերակ կա՝ արտահերթ խորհրդարանական ընտրությունների անցկացումը։
Ելնելով վերը նշվածից՝ խորհրդարանական և հետաքրքրված արտախորհրդարանական ուժերին հրավիրում եմ խորհրդակցությունների՝ 2021 թվականին արտահերթ խորհրդարանական ընտրություններ անցկացնելու հարցով», - հայտարարել է վարչապետը։
English
Русский
