ՊՆ-ի դիմաց կրկին բողոքի ցույցեր են: Այնտեղ են քաղաքացիներ, որոնք պահանջում են ՊՆ-ից սահմանազատման հարցերով հանձնաժողով ստեղծել: Այնտեղ են նաև անհետ կորած զինծառայողների ծնողները: Սահմանազատման խնդրով հավաքված քաղաքացիներին մտահոգում է այն հարցը, թե ինչու է իշխանությունը վերցնում այնպիսի քարտեզներ, որոնք չեն բխում քաղաքացու շահերից.
«Պարզ երևում է, որ Ադրբեջանը և Թուրքիան հեռահար նպատակներ ունեն, նրանց նպատակը Սյունքը և Հայաստանը վերցնելն է: Այս իրավիճակում մեր իշխանությունները պարտավոր են պաշտպանել մեր շահերը, եթե դա չեն անում, ուրեմն պաշտպանում եմ Թուրքիայի և Ադրբեջանի շահերը»,- այս մասին ասաց բողոքի ակցիա իրականացնողներից մեկը:
Անհետ կորած զինվորների ծնողներից մեկը նշեց.
«Թո՛ղ տան մեր երեխեքին, գոնե լաց լինենք վրաները: Հիմա ես հանցագործության մասին հայտարարություն եմ տալիս, հոկտեմբերի 14-ին շարայինի պետը թողել է դիակը գետնին ու 7 ծնողներիցս ոչ մեկս չենք իմանում, թե ում դիակն ա եղել: Հետո, երբ մոտեցել ենք այդ դիակը դուրս բերելու, այն այլևս չի եղել: Ա՛յ ֆաշիստ, ինչի էդ դիակը հետդ չես իջեցրել, կարո՞ղ է շարայինի պետը պատասխան տալ: Հիմա՝ ես գնամ դրան գլխից խփեմ, ինձ կդատե՞ն չէ: Եթե չկալանավորեն նրան, ես կամ պիտի իրեն գնամ գլխից խփեմ, կամ էլ թող իմ մինուճար տղային վերադարձնեն ինձ»:
Անհետ կորած զինծառայողներից մեկի մայրն էլ ասաց, որ իր երեխային հողաթափերով թողել են ճանապարհի կեսին, որից հետո որդին ենթարկվել է ռմբակոծման.
«Երեխայիս թողել են կես ճամփին, իրանք փախել են, որտե՞ղ եք տեսել դուք տենց հայ: 19 զինծառայողի տարել են դիրքեր, իմ տղան էլ նրանց մեջ՝ կանտուզիա ստացած, առանց զրահաբաճկոնի, փոխարենը պետք է ուղարկեին նրան մայրական խնամքի: Երբ պայթացրել են իրենց մեքենան, շարայինի պետը, սպան թողել են երեխեքին արնաշաղաղ ու փախել են»,- հուզված պատմում է անհետ կորածի մայրը:
English
Русский
