Պուտինի զանգը Բլինքենից հետո

1in.am-  Մարտի 16-ին տեղի է ունեցել Հայաստանի վարչապետ Նիկոլ Փաշինյանի հեռախոսազրույցը ՌԴ նախագահ Պուտինի հետ: Ինչպես հայտնել է Հայաստանի վարչապետի աշխատակազմը, հեռախոսազրույցի ընթացքում քննարկվել է հարցերի լայն շրջանակ, այդ թվում բնականաբար իրավիճակը մեր ռեգիոնում: Ըստ հայկական կողմի հաղորդագրության՝ «Նիկոլ Փաշինյանը և Վլադիմիր Պուտինն անդրադարձել են նաև Հայաստանի կողմից ԵԱՀԿ Մինսկի խմբի համանախագահությանն ուղղված դիմումին, որը վերաբերում է խաղաղության պայմանագրի շուրջ բանակցությունների կազմակերպմանը»:

Կրեմլի տարածած հաղորդագրության մեջ այդ թեմային անդրադարձ չկա և նշվում է, որ քննարկվել է եռակողմ հայտարարությունների կատարման ընթացքը, նաև հրադադարի պահպանմանն ու հետագա տրանսպորտային հաղորդուղիների ապաշրջափակմանն առնչվող հարցեր: Ընդ որում հատկանշական է, որ հեռախոսազրույցը տեղի է ունեցել նույն օրը, երբ մի քանի օրվա արգելափակումից հետո ադրբեջանական կողմը սկսել է Արցախ գնացող գազատարի նորոգումը, ինչից հետո հնարավոր կլինի վերականգնել Հայաստանից գազամատակարարումն Արցախ:

Ժամանակագրական այդ զուգադիպությունը պատահակա՞ն է, թե ՌԴ նախագահն ու Հայաստանի վարչապետը քննարկել են թեմաներ, որոնց կապակցությամբ էլ Ադրբեջանը օրեր շարունակ թույլ չէր տալիս նորոգել վթարված գազատարը: Ի՞նչ է արձագանքել Ռուսաստանը ԵԱՀԿ ՄԽ համանախագահությանն ուղղված Հայաստանի դիմումի առնչությամբ, որով Երևանը կոչ է անում համանախագահներին կազմակերպել Հայաստան-Ադրբեջան բանակցություն: Ռուսաստանն ունի՞ այդ կապակցությամբ հետաքրքրություն, թե՞ հակառակը՝ շահագրգռված է, որպեսզի Երևանը մեծ աշխուժություն չցուցաբերի այդ դիմումի կապակցությամբ: Փաշինյան-Պուտին հեռախոսազրույցը հատկանշական է նաև այն ֆոնին, որ մարտի 14-ին և 15-ին տեղի են ունեցել ԱՄՆ պետքարտուղար Բլինքենի հեռախոսազրույցները նախ Նիկոլ Փաշինյանի, իսկ հետո նաև Իլհամ Ալիևի հետ:

Ընդ որում ուշագրավ է և այն, որ Փաշինյան-Պուտին հեռախոսազրույցի նախաձեռնողը կարծես թե եղել է ռուսական կողմը, համենայնդեպս դատելով Կրեմլի հաղորդագրությունից, որտեղ սովորաբար նշվում է, եթե զանգի նախաձեռնողը լինում է այսպես ասած դիմացի կողմը: Այս դեպքում չկար նշում, որ զրույցը տեղի է ունեցել Երևանի նախաձեռնությամբ: Կլինի՞ հաջորդիվ Պուտինի զանգն Ալիևին: