Պուտինը նոր հրաման ստորագրեց գազը ռուբլիով վճարող երկրների համար

Պուտինն ասել է, որ հրամանագիր է ստորագրել ոչ բարեկամ երկրների հետ ռուսական գազի դիմաց ռուբլով վճարելու նոր կարգի մասին: Նրանք պետք է հաշիվներ բացեն ռուսական բանկերում։ Հրամանն ուժի մեջ կմտնի ապրիլի 1-ից։

 Դմիտրի Պեսկովն էլ հայտարարել էր, որ Ռուսաստանը կարող է դադարեցնել գազի մատակարարումը Եվրոպա, եթե դրա դիմաց չվճարեն ռուսական արժույթով։

Եվրոպան հրաժարվում է ռուսական գազի համար ռուբլով վճարել։ Անցած օրերին Կրեմլի ղեկավարն էր պահանջել Ռուսաստանի դեմ պատժամիջոցներ սահմանած եվրոպական երկրներից ռուսական գազի դիմաց վճարումներն այսուհետ ռուբլով իրականացնել։

Այսկերպ Մոսկվան փորձում է ամրապնդել պատերազմի ֆոնին գահավիժող ռուբլու փոխարժեքը։ «Մենք չենք վճարի ռուբլով, այս հարցում մենք միասնական ենք Եվրամիության մյուս երկրների հետ», - նախօրեին հայտարարում էր Ավստրիայի պաշտպանության նախարար Կլաուդիա Տեները։

Երեկ Պուտինի հետ հարցը քննարկել է նաև Գերմանիայի կանցլեր Օլաֆ Շոլցը։ Գերմանիան ու Ավստրիան «վաղ նախազգուշացման մեխանիզմ» են գործարկել՝ ռուսական գազի մատակարարումների ընդհատումների կամ ամբողջական դադարեցման հնարավորության պատճառով։

Պաշտոնական Բեռլինը չի բացառում, որ Գերմանիան առաջիկայում կարող է ռուսական գազի մատակարարման ընդհատումների բախվել, և կոչ է արել սպառողներին, ընկերություններին նվազեցնել գազի օգտագործումը, Ավստրիայի իշխանություններն էլ մտադիր են ուժեղացնել վերահսկողությունը գազի շուկայում։ «Ֆրանսիան դեմ է ռուբլով հաշվարկներին»,- իր հերթին, հայտարարել է նախագահ Էմանյուել Մակրոնը՝ պնդելով, որ ռուսաստանցի պաշտոնակցի պահանջը պայմանագրի խախտում է։

Պուտինի պահանջին չեն պատրաստվում հետևել նաև Մեծ յոթնյակի անդամ արևմտյան երկրները, որոնք այդ մասին համատեղ հայտարարություն են տարածել՝ ընդգծելով, որ «դա պայմանագրերի միակողմանի և ակնհայտ խախտում է»։