«Նրանց երազանքը հիմա զուգարանակոնք գողանալն ու մեռնելն է»

Ուկրաինայի նախագահ Վլադիմիր Զելենսկին երեկոյան տեսաուղերձում մեկնաբանել է ռուս զինվորականների հայտարարած նպատակները՝ վերահսկողության տակ առնել Ուկրաինայի ամբողջ Սևծովյան ափը և հասնել Մոլդովայի հետ սահման։

«Այսօր ռուս զինվորականներին հղումով լուր է տարածվել, որ իբր այժմ նրանց խնդիրն է վերահսկողություն հաստատել Ուկրաինայի հարավում և մուտք գործել Մոլդովայի սահման։ Իբր այնտեղ, Մոլդովայում ոտնահարվում են ռուսախոսների իրավունքները։ Այն տարածքը, որտեղ Ռուսաստանը պետք է հոգա ռուսախոսների իրավունքները, հենց Ռուսաստանն է։

Այնտեղ, որտեղ չկա խոսքի ազատություն, չկա ընտրության ազատություն: Այլ կարծիքի իրավունք ուղղակի չկա։ Այնտեղ, որտեղ ծաղկում է աղքատությունը, և որտեղ մարդկային կյանքն արժեք չունի: Այնքան, որ գալիս են մեզ մոտ, պատերազմ՝ նորմալ կյանք հիշեցնող որեւէ բան գողանալու։ Գիտեք, թե նախկինում ինչպես էին խոսում ամենամեծ երազանքի մասին՝ տեսնել Փարիզը և մեռնել։ Նրանց երազանքը հիմա զուգարանակոնք գողանալն ու մեռնելն է», ասել է Ուկրաինայի նախագահը:

Զելենսկին այսպիսով ակնարկել է ռուս զինվորականների՝ Ուկրաինայի օկուպացված բնակավայրերում թալանի ու դիակապտության մասին։ Ինչ վերաբերում է զուգարանակոնքին, բնակիչների վկայություններ կան, որ ՌԴ խորքերից սերող ռուս զինվորականներից շատերն առաջին անգամ էին զուգարանակոնք տեսնում ու չգիտեին, թե դա ինչի համար է։ Հայտնի հրապարակախոս Ալեքսանդր Նեւզորովը Ռուսաստանը անվանել է 30 մլն արտաքնոցների երկիր։

Lragir.am