Մեր պահանջը հստակ է՝ մեր երեխաներին Արցախից վերադարձնեն Հայաստան, նախարարից բոլորս դա էինք պահանջում, լրագրողների հետ զրույցում ասացին ժամկետային զինծառայողների՝ պաշտպանության նախարար Վաղարշակ Հարությունյանի հետ հանդիպումից դուրս եկած ծնողները:
«Բայց նախարարն ասեց, որ դա հնարավոր չի, եթե բանակն Արցախից դուրս գա, հնարավոր է՝ կռիվ լինի: Մնաց երեխաներին 10-օրյա արձակուրդ նշանակելը, Հայաստանում ծառայող երեխաները գնան Արցախ, նրանց փոխարինեն: Նախարարն ասաց՝ բացառվում է, որ Արցախից զորքը հանվի: Երեխաները կգան արձակուրդ, հետո նորից հետ կգնան ծառայելու, ամսի մեկից կսկսվի «սմենափոխության» նման մի բան:
Մենք հարցրեցինք՝ կարո՞ղ եք ապահովել շարքայինների անվտանգությունը, նախարարն ասեց՝ այո: Բայց մենք վստահ չենք», - նշեցին ծնողները:
Նրանք Վաղարշակ Հարությունյանին ասել են՝ պատրաստ են անձնապես գնալ և իրենց երեխաներին տեղափոխել Հայաստան:
«Հիմա նախկին Արցախը չէ, և դիվերսիան ամեն րոպե կարող է մտնել, մեր երեխաներին վնասել: Բայց նախարարն ասեց, որ մեր երեխաները հարյուր տոկոսով անվտանգ են», - նշեց նախարարի հետ հանդիպումից դուրս եկած մեկ այլ ծնող:
Նախարար Հարությունյանը միաժամանակ առաջարկել է վաղը հինգ ծնողի կրկին ընդունել՝ վերջնականապես քննարկելու ժամկետային զինծառայողներին արձակուրդ տրամադրելու հարցը: Նախարարը, սակայն, զգուշացրել է՝ բոլորին միանգամից արձակուրդ տալ չեն կարող, գործընթացը փուլ առ փուլ պետք է իրականացվի:
Հարցին՝ որո՞նք են լինելու իրենց հետագա քայլերը, ժամկետային զինծառայողների ծնողները պատասխանեցին՝ դեռևս վերջնական որոշում չունեն:
English
Русский
