«Կես ժամ ժամանակ եմ տալիս այդ լրատվամիջոցի շեֆերին»․ Մխիթար Հայրապետյան

ԱԺ-ում քննարկվում է «Տեսալսողական մեդիայի մասին» օրենքի նախագիծը։

Նախագծի համահեղինակ, «Իմ քայլը» խմբակցության պատգամավոր Մխիթար Հայրապետյանը հայտնեց, որ քիչ առաջ իրեն մի լրատվականի նյութ են ուղարկել, որը վերնագրված է՝ «Ազգային ժողովում այս պահին քննարկվում է ռուսական հեռուստաալիքների դեմ օրենքի նախագիծը»։

«Անունը դեռևս չեմ տա, կես ժամ ժամանակ եմ տալիս էդ լրատվամիջոցի շեֆերին՝ կա՛մ արագ վերնագիրը փոխում եք, կա՛մ նյութը հեռացնում․․․ Նախագծում խոսում ենք մեդիա դաշտում նոր կանոնակարգումների մասին»,- ասաց նա։

Ավելի վաղ ԱԺ «Իմ քայլը» խմբակցության պատգամավոր, նախագծի համահեղինակ Վահագն Թևոսյանը, ներկայացնելով նախագծերի փաթեթը, նշել էր, որ 2020 թվականի հուլիսի 20-ին պետք է հայտարարվեն հանրային մուլտիպլեքսի ազատ թվային տիրույթների մրցույթներ, և հունվարի մեկից հանրային հեռուստացանցն արդեն հագեցած կլինի նոր մեդիածառայություններով։