Ուկրաինայի նախագահ Վլադիմիր Զելենսկին հայտարարել է, որ իշխանությունները երկրի պաշտպանության վեց տարբերակ ունեն։ Այս մասին նա ասել է CNN-ին և Reuters-ին տված հարցազրույցում։
Երկրի ղեկավարի խոսքով՝ իշխանությունները պատրաստվել են «ամեն ինչի» և երկրի պաշտպանության տարբերակներ են մշակել:
«Բայց երբ դու պատրաստվում ես նախապես, պարտադիր չէ նախապատրաստել քո թշնամուն, որ նա պատրաստ լինի քո արձագանքին։ Այդ պատճառով ինձ դուր չէր գալիս այս իրավիճակը, որ մենք պետք է ռիսկի ենթարկենք բոլորին և ասենք, որ մենք պատրաստվում ենք։ Մենք ունենք մեր երկրի պաշտպանության վեց տարբերակ», – ասել է Զելենսկին ։
Պետության ղեկավարը ՆԱՏՕ-ից անվտանգության երաշխիքներ է պահանջել այն դեպքում, եթե դաշինքը Ռուսաստանի պատճառով չընդունի Ուկրաինային։
«Մենք պայքարում ենք, իսկ ուկրաինական ազգը պայքարելու է մինչև վերջ։ Հարցը մեր մեջ չէ, հարցն այն է, թե որքան կդիմանա այդ (ռուսական – խմբ.) ղեկավարությունը։ Մենք պաշտպանվում ենք, քանի որ մենք տանն ենք, պաշտպանում ենք մեր երեխաներին, մեր տները։ Հանուն մեր երեխաների ապագայի։ Երեխաներ են մահանում, տասնյակ երեխաներ։ Մենք պաշտպանում ենք ապրելու մեր իրավունքը», – հավելել է նախագահը ։
Զելենսկին նաև կարծում է, որ եթե պատժամիջոցները նախկինում կիրառվեին, ոչ մի ներխուժում չէր լինի։
«Աշխարհը տեսնում է, որ պետք է նստել բանակցությունների սեղանի շուրջ»,- ընդգծել է Զելենսկին:
English
Русский
