Կորոնավիրուսը սպառնում է բոլորին.Երևանի գլխավոր ախտաբան (տեսանյութ)

Կորոնավիրուսը սպառնում է  բոլորին, միշտ ունենալու ենք կորոնավիրուս, եթե անգամ ինչ-որ մի ձևով՝ դեղորայքով կարողանանք վիրուսը վերացնել, չպետք է մոռանանք, որ վիրուսն ունի բնական ռեզերվուար, դրանք չղջիկներն են:

Այս մասին Tert.am-ի հետ զրույցում ասաց Երևանի գլխավոր ախտաբան, Ախտաբանների ասոցացիայի նախագահ Արմեն Մխիթարյանը:

Հարցին, թե  երբ աշխարհում կորոնավիրուսը արդեն 2-3 ամիս է, ինչ կար, ՀՀ առողջապահության նախարարը հայտարարում էր՝ կորոնավիրուսը վտանգավոր չէ, Ձեր ասոցացիան չէ՞ր ահազանգում, որ վտանգավոր է:

«Դժվար կմեկնաբանեմ նախարարի ասածը, բայց պետք է ասեմ, որ սա 7-րդ կորոնավիրուսն է և դրանցից 4-ը որևիցե վտանգ չէին ներկայացնում: Ինչո՞ւ արձագանք չեղավ ի սկզբանե մեր կողմից, որովհետև ես սպասում էի միջազգային և արտասահմանյան իմ կոլեգաների կատարած որևէ մի նյութի կամ աշխատանքի, որի վրա կարելի էր հիմնվել և ասել, որ այսպիսի բարդություններ ու փոփոխություններ է առաջացնում օրգանիզմում ու այն վտանգավոր վիրուս է: Նմանատիպ հետազոտությունները սկսեցին ի հայտ գալ մարտի կեսերից: Արտասահմանում իմ գործընկերներն ուղարկեցին հրապարակումներ, թե ինչ է արվել և ինչ փոփոխություններ են տեղի ունենում օրգանիզմում և պարզ դարձավ, որ մենք սովորական վիրուսի հետ գործ չունենք»,- ընդգծեց նա: