Կփոխի խաղի կանոնները. Պուտինն ինչ զենք ունի, որը վախեցնում է բոլորին

iPress.am- Ռուսաստանը մի քանի զինատեսակ ունի, որոնք հնարավոր ռազմական հակամարտության դեպքում կարող են փոխել խաղի կանոնները։ Այս մասին գրում է չինական Huánqiú Shíbào պարբերականը։

Փորձագետ Չժան Սյուեֆենի խոսքով՝ նման սպառազինությունը ՌԴ նախագահ Վլադիմիր Պուտինին կօգնի հաղթող դուրս գալ ՆԱՏՕ-ի երկրների հետ դիմակայությունից:

Huánqiú Shíbào-ն թվարկել է ՌԴ-ում մշակվող երեք զենքերը, որոնցից պետք է զգուշանան մյուս պետությունները։ Դրանցից առաջինը «Սարմատ» բալիստիկ հրթիռներն են։

Հենց դրանք են ամենից շատ գրավել չինացի ռազմական փորձագետի ուշադրությունը։ Սյուեֆենը նշել է, որ «Սարմատը» ռուսական ինքնատիպ ոճ ունի։ Քանի դեռ Արևմուտքը փորձում է պինդ վառելիքով աշխատող, ծովային բազավորման թեթև հրթիռներ արտադրել, Ռուսաստանն աշխատում է հեղուկ վառելիքով շարժիչներ ունեցող զենքի վրա:

««Սարմատն» արդյունավետ միջոց է «միջուկային առաջին հարվածն» իրագործելու համար», - նշել է Huánqiú Shíbào–ի փորձագետը:

Սյուեֆենի ուշադրությունից չի վրիպել նաև ծովային տեղակայման «Ցիրկոն» գերձայնային հրթիռը, որի հիմնական առավելություններն են ցածր գինը, փոքր չափը, տպավորիչ հեռահարությունն ու հզորությունը։

Վկայակոչելով Ռուսաստանի նախագահ Վլադիմիր Պուտինի խոսքերը՝ փորձագետը նշել է. ««Ցիրկոնը» կդառնա աշխարհում միակ գերձայնային թևավոր հրթիռը, որն իսկապես կլինի սպառազինության մեջ»:

Huánqiú Shíbào–ի հոդվածագիրն առանձնացրել է նաև C-500 «Պրոմեթեյ» հակաօդային և հակահրթիռային պաշտպանության մարտական համալիրը: Նա նշել է, որ այս պահին զենքի բնութագրերը գաղտնի են պահվում, բայց հայտնի դարձած փաստերը ստիպում են ենթադրություններ անել։

Մի բան հստակ է՝ C-400-ն ուղղված է օդային թիրախների խոցմանն ու մարտավարական նշանակության բալիստիկ հրթիռներից պաշտպանվելուն։

«Ռուսաստանում զենք են ստեղծում հիմնականում «խաղի կանոնները փոխելու» և հակառակորդներին ասիմետրիկ հարված հասցնելու գործում բեկումնային արդյունքներ ստանալու համար», - ընդգծել է չինացի փորձագետը:

Նա հայտարարել է, որ նման պրակտիկան անշուշտ արժանի է ուշադրության։