Ինչ է քննարկել ԲՀԿ–ն խմբակցության նիստի ժամանակ. մանրամասներ

«Բարգավաճ Հայաստան» կուսակցությունն այսօր խմբակցության նիստ է անցկացրել, որը նախագահել է ԲՀԿ ղեկավար Գագիկ Ծառուկյանը։ Sputnik Արմենիայի հետ զրույցում  Ծառուկյանի մամուլի խոսնակ Իվետա Տոնոյանը հայտնեց, թե ինչ հարցեր են քննարկվել նիստի ժամանակ։

Խմբակցության նիստի ժամանակ քննարկվել են մեր նախորդ` հրատապ նիստին հաջորդած իրադարձությունները, ինչպես նաև առաջիկա անելիքներին է անդրադարձ կատարվել։ Խոսվել է նաև Ծառուկյանի` համախմբման կոչին առնչվող կազմակերպվելիք հանդիպմուների մասին»,–ասաց Տոնոյանը։

Նրա խոսքով` Ծառուկյանի համախմբման կոչին ընդառաջ քաղաքական ուժերի, անհատների, մտավորականների և ՀԿ–ների մասնակցությամբ հանդիպումները շարունակվում են։ Սակայն դրանց բովանդակային մասին դեռ չեն անդրադառնա։

Իվետա Տոնոյանը չնշեց, թե որ քաղաքական ուժերի հետ են հանդիպումներ լինում, սակայն հիշեցրեց, որ ԲՀԿ–ի կողքին հասարակության կողմից մերժելի որևէ քաղաքական ուժ կամ անձ չի լինելու։

Անդրադառնալով Ծառուկյանի հայտարարությունից հետո հնչող քննադատություններին` Տոնոյանը նշեց` ցավում է, որ Գագիկ Ծառուկյանի կողմից հնչեցվածը արժանացավ նման բովանդակազուրկ քննադատության։ «Ծառուկյանի հնչեցրած փաստերին որևէ հակադարձում չարեցին նրան քննադատող ներկայիս իշխանության ներկայացուցիչները։ Նրանց հակադարձումները հիմնված էին շանտաժի և ցինիզմի վրա»,–ասաց Տոնոյանը։

Հիշեցնենք, որ հունիսի 5-ին «Բարգավաճ Հայաստան» կուսակցության քաղաքական խորհրդի հրատապ նիստ էր տեղի ունեցել։ Ծառուկյանը նիստի ժամանակ ասել էր, որ մենք երկիր ենք կորցնում ու քաղաքական առողջ ուժերին համախմբման կոչ արել։ Նա նշել էր, որ կառավարության բոլոր անդամները պետք է փոխվեն։