Ողբերգական դեպք. հոկեյիստը մահացել է տափօղակի հարվածից. ՏԵՍԱՆՅՈՒԹ

iPress.am-Ռուսաստանի Հոկեյի երիտասարդական լիգայում հանդես եկող Սանկտ-Պետերբուրգի «Դինամոյի» պաշտպան Թիմուր Ֆայզուտդինովը մահացել է 19 տարեկան հասակում՝ Յարոսլավլում կայացած խաղում տափօղակով հարված ստանալու արդյունքում:  

Ողբերգական միջադեպը տեղի է ունեցել մարտի 12-ին՝ Յարոսլավլի «Լոկոմոտիվի» հետ արտագնա խաղում (1:5):   Երկրորդ խաղակեսի վերջում «Լոկոմոտիվի» խաղացողի նետած տափօղակը դիպել է Ֆայզուտդինովի քներակին:

Վերջինս գրեթե անմիջապես կորցրել է գիտակցությունը և նրան ծայրահեղ ծանր վիճակում տեղափոխել են տեղի հիվանդանոց, որտեղ Թիմուրին միացրել են արհեստական շնչառության և արյան շրջանառության սարքավորումներին: Բժիշկները նրա կյանքի համար պայքարել են չորս օր, սակայն հոկեյիստին փրկել հնարավոր չի եղել:  

Ֆայզուտդինովը «Դինամոյում» հանդես էր գալիս 2016 թվականից: Այս մրցաշրջանում նա անցկացրել էր 52 խաղ:   Նշենք, որ զոհված հոկեյիստի մայրը կոչ է արել ճակատագրական նետումի հեղինակ, «Լոկոմոտիվի» խաղացող Դմիտրի Տյուվիլինին չքննադատել և նրա անունը չշահարկել մամուլում: «Ցանկանում եմ ասել, որ նա հիմա պետք է նաև իմ տղայի համար էլ խաղա: Սառնա ավելի լավն ու ուժեղ», ասել է Ելենա Ֆայզուտդինովը: