Հրապարակվել են Հանդիպման պայմանավորվածության մանրամասները

ԵԱՀԿ Մինսկի խմբի համանախագահները (Իգոր Պոպով, ՌԴ, Ստեֆան Վիսկոնտի, Ֆրանսիա, Էնդրյու Շոֆեր, ԱՄՆ) հայտարարություն են տարածել. Համանախագահները Ժնևում հոկտեմբերի 30-ին առանձին և համատեղ հանդիպումներ են անցկացրել Հայաստանի արտգործնախարար Զոհրաբ Մնացականյանի և Ադրբեջանի արտգործնախարար Ջեյհուն Բայրամովի հետ: Հանդիպումներին մասնակցել է նաև ԵԱՀԿ Գործող Նախագահի անձնական ներկայացուցիչ Անջեյ Կասպրշիկը:

Նրանք նաև խորհրդակցություններ են ունեցել նաև ՄԱԿ Փախստականների հարցերով Գերագույն հանձնակատար Ֆիլիպո Գրանդիի և ԿԽՄԿ նախագահ Փիթեր Մոուրերի հետ:

Համանախագահները ևս մեկ անգամ կողմերին կոչ են արել լիարժեքորեն կատարել իրենց ստանձնած պարտավորությունները, ներառյալ` մարդասիրական հրադադարի անհապաղ հաստատում` համաձայն հոկտեմբերի 10-ին Մոսկվայում ընդունված համատեղ հայտարարության, որը կողմերը վերահաստատել են Փարիզում` հոկտեմբերի 17-ին և Վաշինգտոնում` հոկտեմբերի 25-ին:

Կողմերը, առանց հրադադարի հաստատման կամ այլ պարտավորությունների նկատմամբ վերապահումների, համաձայնել են հրատապ կարգով մի շարք քայլեր ձեռնարկել, ներառյալ`

- Կողմերը թիրախային հարվածներ չեն հասցնելու քաղաքացիական բնակչությանը կամ ոչ ռազմական օբյեկտներին` համաձայն միջազգային մարդասիրական իրավունքի,

- Կողմերը ակտիվորեն ներգրավվելու են մարտադաշտում զոհվածների աճյունների վերականգնման և փոխանակման աշխատանքներում` անհրաժեշտ անվտանգային երաշխիքներ տրամադրելով ԿԽՄԿԿ և ԵԱՀԿ ԳՆ անձնական ներկայացուցչին` միջնորդության համար,

- Կողմերը մեկ շաբաթվա ընթացքում ԿԽՄԿԿ և ԵԱՀԿ ԳՆ անձնական ներկայացուցչին են տրամադրելու ներկայումս ռազմագերիների ցուցակը` մուտքի ապահովման և վերջնական փոխանակման նպատակներով,

- Կողմերը գրավոր կերպով տրամադրելու են մեկնաբանություններ և հարցեր` կապված հնարավոր հրադադարի վերիֆիկացիոն մեխանիզմների հետ` համաձայն հոկտեմբերի 10-ի համատեղ հայտարարության 2-րդ կետի: Կողմերը ներգրավվել են բաց և բովանդակային մտքերի փոխանակման գործընթացում` նպատակ ունենալով չժճշգրտել իրենց բանակցային դիրքորոշումները համապարփակ լուծման հիմնարար տարրերի շուրջ` համաձայն հոկտեմբերի 10-ի համատեղ հայտարարության 3-րդ կետի:

Համանախագահները շարունակելու են ակտիվորեն աշխատել կողմերի հետ` հակամարտությանը խաղաղ կարգավորում գտնելու համար: