«Հայկական ժամանակ»-ն անդրադարձել է Վատիկանում Հայաստանի նախկին դեսպան, Սերժ Սարգսյանի փեսա Միքայել Մինասյանի՝ «երկար տարիներ ֆինանսավորել է Նիկոլ Փաշինյանի թերթը» հայտարարությանը. «Սերժ Սարգսյանի փեսա Միքայել Մինասյանը իր հերթական խոհանոցային տեսանյութում անդրադարձել է «Հայկական ժամանակ» օրաթերթին: Եթե կարճ ձևակերպենք նրա ասածը, իմաստը հետևյալն է. ինքը փող է տվել մեր թերթին, որպեսզի իր ընտանիքի մասին վիրավորական հրապարակումներ չլինեն:
Էստեղ, ինչպես ասում են, Մինասյանն աղտոտել է իր եփած բորշչը և հանգամանքների բերումով մենք հիմա կապացուցենք այդ մարդու էությունը և բոլորդ կտեսնեք, որ շանտաժը նրա և նրա ընտանիքի հիմնական գործելակերպն է:
Ընդգծենք, այն ինչ կկարդաք ստորև, հիմնավորված է աուդիոձայնագրություններով, սքրինշոթերով: Նաև ուզում ենք ասել, որ այսպես ստացվել է ոչ թե այն պատճառով, որ մենք ինչ-որ մեկին թաքուն և նենգաբար ձայնագրել ենք, այլ պարզապես աուդիոհաղորդագրությունները և տեքստային հաղորդագրությունները դարձել են այս խոսակցության հիմնական գործիքը և Մինասյանի երեկվա զառանցանքից հետո հաճելի զարմանքով արձանագրեցինք, որ այդ ամենը դեռ պահպանվել են սոցիալական ցանցի արխիվում: Նկատի ունենք, այս պատմության մեջ ոչ ոքի նկատմամբ ոչ մի անազնվություն թույլ չենք տվել, ինչը շատ կարևոր է:
Ասենք նաև, որ առնվազն այս փուլում կօգտագործենք պայմանական անուններ, իսկ խոսակցության բովանդակությունը կփոխանցենք ճշգրիտ՝ բայց որոշակիորեն խմբագրված, ավելի ճիշտ՝ մաքրագրելով այն տնայնախոսույթունից, երբեմն՝ հայհոյախոսությունից: Ի վերջո, այն ժամանակ մարդիկ չեն ակնկալել, որ սա երբևէ հրապարակվելու է և ուրեմն հաղորդակցությունը մաքուր գրական հայերենով չի եղել:
Եվ ուրեմն՝ մի քանի տարի առաջ «Հայկական ժամանակի» կայքում՝ armtimes.com-ում, տպագրվում է մի նյութ մի դատական պրոցեսի մասին, որի վերնագիր է դառնում դատավարության մասնակիցներից մեկի կողմից արած հայտարարությունը, որի մեջ օգտագործվում է Սաշիկ և Միշիկ ձևերը:
Մի անձ, ով Հայաստանում հայտնի է որպես Միքայել Մինասանի անձնական ներկայացուցիչ (անվանենք նրան՝ Այսինչ) և այսօր էլ հանդես է գալիս այդ դերում, Միջնորդի միջոցով (անվանենք նրան՝ Միջնորդ) կապվում է «Հայկական ժամանակի ղեկավար ներկայացուցիչներից մեկի հետ, թողնելով հետևյալ հաղորդագրությունը. «Այսինչն էր զանգել. «ՀԺ»-ում նյութ կա, որ վերնագրի մեջ գրված է Միշիկ: Ասում է՝ մենք ժամանակին պայմանավորվածություն ունենք, թե համագործակցություն (նկատի ունի՝ «ՀԺ»-ի հետ), որ այդ ձևով չգրվի, խնդրում է, որ փոխեն: Ավելի շատ՝ Սաշիկի մասով չէ, Միշիկի մասով: Կարճ ասած՝ խնդրանքն էն էր, որ վերնագիրը փոխվի: Ասացի՝ կփոխանցեմ»:
«ՀԺ»-ի ներկայացուցիչն այս ուղերձին պատասխանել է հետևյալ կերպ. «Ի՞նչ պայմանավորվածություն: Խնդրանքը հասկացա, բայց ի՞նչ պայմանավորվածություն: Չի լինի, առավելևս, եթե զուգահեռ խառնակիչ ձևակերպումներ են օգտագործվում: Էդ ո՞ւմ հետ է ձեռք բերվել պայմանավորվածություն և ո՞վ է պայմանավորվել: Քանի որ քո միջոցով է ասել, թող քեզ էլ պատասխանի կոնկրետ, էդ ի՞նչ պայմանավորվածություն է»:
Մանրամասները՝ սկզբնաղբյուրում:
English
Русский
