Մենք բոլորս հավաքված պահանջում ենք, խնդրում ենք, որ պարոն վարչապետը գա, հանդիպենք, և ինչ-որ լուծում մեզ առաջարկի, կամ ասի՝ ժողովուրդ, գնացեք տներով, ես ձեզ չեմ օգնելու, կամ ասի` բանակցում ենք. այս մասին կառավարության դիմաց լրագրողների հետ զրույցում ասաց ՌԴ մեկնել ցանկացող քաղաքացիներից Արթուր Ոսկանյանը:
«Մենք տարբեր մարդկանց հետ ենք հանդիպել՝ նախարարի, պատգմավորների, ոչ մի առաջընթաց չկա, մենք խնդրում ենք պարոն վարչապետին, 10 րոպեով թող գա, ինչ-որ հույս տա, մենք ԵԱՏՄ անդամ ենք, չէ՞, տեղաշարժի առավելություն ունենք, կորոնավիրուսի թվերն իջել են, ինչո՞ւ լուծում չի լինում: Թող ինքը իջնի, մեզ էլ ոչ ոք չի հետաքրքրում: Մեզ ասում են` սպասեք, ինչքա՞ն սպասենք: Ասում ենք՝ ընտանիքները բաժանվել են, ասում են՝ թող էնտեղ մնացածները գան, եթե գան, կարո՞ղ են նրանց այն եկամուտն ու աշխատավարձը տան, ինչ-որ Ռուսաստանում են ստանում, իհարկե, ոչ»,- ասաց նա:
Նա, դիմելով վարչապետին, ասաց. «Պարոն վարչապետ, էսքան մարդ խնդրում է հանդիպում, ես այսօր կանգնած եմ այստեղ, Ձեր շարժմանն էլ եմ մասնակցել, սատարել եմ Ձեզ, հիմա մենք խնդրում ենք մեկ լուծում՝ կա'մ սահմանները բացվի, կա'մ ինչ-որ տրանզիտ ճանապարհ լինի, իսկ եթե չգա, դա ընդամենը արհամարհանք կլինի իր ժողովրդի նկատմամբ»,- ասաց նա:
English
Русский
