Lragrir.am- ՌԴ նախագահ Պուտինը չինական Սինխուա գործակալության համար հոդված է գրել, որը տեղադրված է Կրեմլի կայքում։ Նա գրել է, որ Ռուսաստանն ու Չինաստանը ձգտում են թույլ չտալ միջազգային իրավական համակարգի լղոզումը, որի կենտրոնում ՄԱԿ կանոնադրությունն է։ Չինաստանի հետ միասին աշխատում ենք համաշխարհային գործերում ՄԱԿ-ի կենտրոնական համակարգող դերի ամրապնդման համար, գրել է Պուտինը։
ՌԴ նախագահի հոդվածում խոսվում է նաեւ Չինաստանի հետ ռազմավարական գործակցության, չինական ներդրումների ու տեխնոլոգիաների օգնությամբ ռուսական Հեռավոր Արեւելքի ու Սիբիրի զարգացման եւ այլնի մասին։ Հոդվածը գրվել է Պուտինի Պեկին այցի կապակցությամբ։
Պուտինը ԱՄՆ-ի ու ՆԱՏՕ-ի հետ դիմակայության ու հնարավոր նոր պատժամիջոցների հարցում ակնկալում է Չինաստանի աջակցությունը, միեւնույն ժամանակ, ըստ ռուս փորձագետների գնահատականների, այդ աջակցությունը կարող է թանկ արժենալ Ռուսաստանին։ Չինաստանը Ռուսաստանին չի համարում հավասար գործընկեր, այլ՝ հումքային եւ տարածքային կցորդ ու մատակարար, եւ այս հանգամանքը կարող է ավելի խորանալ Պեկին Պուտինի այցից հետո։
Չինաստանը կոշտ դիրքորոշում արտահայտեց Ղազախստանում Ռուսաստանի ռազմական ներկայության կապակցությամբ, պահանջելով հանել զորքը։ Ուկրաինայի հարցում Չինաստանը աջակցում է Ռուսաստանին, քանի որ դրա ցանկացած ելքի պարագային մեծանալու է ՌԴ կախվածությունը Չինաստանից, նշում են փորձագետները։
Այդ աջակցությունը Ռուսաստանին Չինաստանը ցուցաբերեց ՄԱԿ-ում, ՌԴ հետ դեմ քվեարկելով Ուկրաինայի հարցով քննարկումներին։ Մոսկվան ու Պեկինը, որոնք ՄԱԿ ԱԽ մշտական անդամներ են, իսկապես ձգտում են «ամրապնդել ՄԱԿ-ի դերը»։
Մոսկվա-Պեկին համագործակցությունը դրսեւորվեց 2020-ի հոկտեմբերին․ Չինաստանը Ռուսաստանի խնդրանքով արգելափակեց ՄԱԿ ԱԽ-ում Լեռնային Ղարաբաղում ռազմական գործողությունների դադարեցման վերաբերյալ բանաձեւի քննարկումը։