iPress.am-Գրեթե երկու տարի է, ինչ ամբողջ աշխարհը համավարակի պատճառով հայտնվել է ցավի ու արտասուքի մեջ: Կորոնավիրուսի հաղթահարման համար օրեցոր բազմաթիվ նոր ծրագրեր են մշակվում. ասես մարդկային գործոնը այսօր ամեն բան թողած միմիայն լծված է պայքարելու այս ցավալի համավարակի վերացմանը: Տարբեր են գաղափարները, թե որտեղից ի հայտ եկավ և մինչև ուր պետք է ձգտի գնալ այս կյանքակործան հիվանդությունը:
Այսօր աշարհում կորոնավիրուսի ամենից դաժան թվերը արձանագրվում են նաև հայության համար կարևոր դարձած Բրազիլիայում: Ցավով ենք նշում այս թվերը, որոնք արձանագրվել են բնակչության զգալի մասի մոտ, բայց մինչև այսօր համավարակի զոհ է դարձել շուրջ 366 հազար մարդ, որոնց մեջ մեծ է նաև երիտասարդների թվաքանակը: Համավարակի դեմ ներկա պահին պայքարում է 12 միլիոն և ավելի մարդ: Ցավաբեր հիվանդության պատճառով Բրազիլիայի հայկական համայնքից մոտ երկու տասնյակ մարդ չի կարողացել հաղթահարել համավարակի ցավալի հարվածները և այն ավարտվել է մահով:
Երկիրը սահմանափակումներ է մտցրել մի շարք ոլորտներում: Եկեղեցիների փակ լինելու պատճառով Բրազիլիայի Հայոց Թեմի առաջնորդ Նարեկ եպիսկոպոս Բերբերյանի գլխավորությամբ և թեմի հոգևորականաց դասի մասնակցությամբ Սան Պաուլոյի հայկական սբ. Գևորգ մայր տաճարի մեջ Տերունական Խաչափայտի մասունքով ջրօրհնյաց կարգ և բժշկության աղոթք կատարվեց՝ տեղի հայ բնակչության, ինչպես նաև մեզ արդեն բարեկամ դարձած Բրազիլիայում ապրող մի շարք ժողովուրդների համար: Կորոնավիրուսից պաշտպանվելու կանոնները ամբողջապես պահպանելով՝ այս գեղեցիկ արարողությունը կյանքի կոչվեց: Թեմի հոգևորականց դասը կազմակերպեց, որպեսզի օրհնված ջրերը հասնեն շատ ու շատ մարդկանց:
Թեմի առաջնորդ Նարեկ եպիսկոպոս Բերբերյանը Բրազիլիայի հայ և օտար ժողովուրդներին համացանցի միջոցով չկոտրվելու և պայքարելու մեծագույն ուժ մաղթեց.
- Աղոթում ենք, որպեսզի Ամենակարող բժիշկը՝ Հիսուս Քրիստոսը իր բարձր հովանու տակ առնի ու պաշտպանի բոլորիս. չդադարենք և հակառակ չշրջվենք մեր Արարչից, Նա մշտամնա մեզ օգնում և առաջնորդում է դեպի պայծառ ու լուսավոր կյանք: