English
Русский
iPress.am-Թանկագին մայրեր և սիրելի քույրեր, Այսօր ավետման տոնն է: Սուրբ Կույս Մարիամ Աստվածածինը եղավ բարի օրինակ ձեզ համար, նրա խոնարհ օրինակով այսօր հազարավոր մանուկներ են կրթվում և դաստիարակվում...Այս օրը խոնարհության տոնն է, այսօր Մայրը Քրիստոսի աստվածսիրության վառ լույսը եղավ մեզ համար: Եվ ինչպես Մարիամ Աստվածածինը իր խոնարհությամբ մոտ է դարձել Աստծուն, այդպես էլ դուք սիրելի մայրեր, ձեր մեջ կրելով Աստվածածնի բարի օրինակը մոտենում էք Արարչին` նմանվելով Նրան` իբրև նոր կյանք պարգևող էակներ:
Մեր ժողովրդի հարուստ ընկալումներում մայրությունը միշտ սրբազան է եղել, և հավատարմությունն այդ ավանդույթներին շարունակվում է առ այսօր։ Մայրության սրբազան ընկալումը կրկին իր ապացույցը գտավ Արցախյան պատերազմի ցավալի օրերին:
Շատ ու շատ մայրեր քայլեցին այն քարքարոտ ու փշոտ ճանապարհներով, որով քայլեց սուրբ Աստվածածինը, երբ իր Որդուն դեպի խաչն էին տանում, այս ցավալի պատերազմի օրերին բազմաթիվ մայրեր իրենց որդիներին ճանապարհեցին պաշտպանելու սրբազան հողն ու սրբազան ընտանիքը, բայց շատերը ցավոք ետ չվերադարձան ու մնացին բարձունքում:
Մեր հատուկ զօրակցությունն ու աղոթքն ենք բերում Ձեզ՝ հերոսածին մայրեր և քույրեր, աղոթում և հայցում ենք Տիրամոր բարեխոսությունը ձեզ համար՝ որպեսզի Երկնավոր մեր Հայրը Իր ամենախնամ Աջի հովանու ներքո պահի ու պահպանի ձեզ, ձեր վիրավոր ընտանիքներին ու զավակներին՝ պարգևելով հոգենորոգ կյանքի վառ ու պայծառ արշալույսներ:
