Եկել ենք տեսնելու, թե անդենական աշխարհն ինչի է նման, պարզվում է`շատ հրաշալի վիճակ է. Facebook–ի պաշտոնական էջում հրապարակած տեսանյութին կից հեգնական գրառում է արել Տավուշի թեմի առաջնորդ Բագրատ եպիսկոպոս Գալստանյանը։
Օրերս հակառակորդն ապատեղեկատվություն էր տարածել, թե Թալիշում զոհվել է հրամանատար, փոխգնդապետ Լեռնիկ Բաբայանը։
«Ահա մեր հրամանատարը ողջ և առողջ «էն աշխարհից»»,– շարունակել է Բագրատ սրբազանն ու նշել, որ հիմա փոխգնդապետ Բաբայանը Տավուշում է։
Սրբազանն որոշել է տեսանյութը հրապարակել հերթական անգամ ապացուցելու, թե ինչպիսի կեղծիքով լի տեղեկատվությամբ են Ադրբեջանում փորձում սնել իրենց ժողովրդին։
«Հրամանատար ջան, ինչպե՞ս ընդունեցիք Ձեր` Թալիշում զոհվելու լուրը»,– հարցնում է Տավուշի թեմի առաջնորդը։
«Հեգնանքով»,– ժպիտով պատասխանում է հրամանատարն ու վստահորեն ավելացնում`ուժեղ ազգ ենք, հաղթելու ենք և հաղթում ենք։
Վերջին տեղեկություններով` հակառակորդի կրակոցների հետևանքով զոհվել են 83 զինծառայողներ և 3 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդի կորուստներն անհամեմատ մեծ են։