Վարչապետ Նիկոլ Փաշինյանն այսօր հայտարարեց, թե աշխատանքային մակարդակում երբեք Ադրբեջանից միջանցք արտահայտություն չեն լսել:
«Ադրբեջանի շանտաժի քաղաքականությունն է, անունը դրել են «Զանգեզուրի միջանցք» ու ասում են՝ եթե միջանցք չտաք, մենք պատերազմով միջանցքը կստանանք: Այս փաստը պետք է դնենք միջազգային հանրության աչքի առաջ», - ասուլիսի ժամանակ հայտարարեց Փաշինյանը:
Նա նշեց, թե սա պետք է ի ցույց դնեն որպես Ադրբեջանի բացահայտ ագրեսիվ քաղաքականություն, որն էլ պետք է գնահատականի արժանանա:
«Ես էլի ասում եմ՝ մենք շահագրգիռ ենք տարածաշրջանային կոմունիկացիների բացման հարցով, որովհետև Հայաստանը 30 տարի գտնվում է շրջափակման մեջ», - ասաց վարչապետը:
Նրա խոսքով՝ չի լինլու այնպես, որ Ադրբեջանը ոնց ուզի, այնպես էլ մտնի ու դուրս գա:
«Չի լինելու այդպիսի բան, բայց, մյուս կողմից, Հայաստանը շահագրգիռ է, որ երկաթուղային ու ավտոմոբիլային կապը վերականգնվի : Այո, Ադրբեջանը պետք է ստանա ճանապարհ, տվյալ դեպքում, Նախիջևանի մասին չէ խոսքը, խոսքը Թուրքիա-Ադրբեջան կապի մասին է ու, իմիջայլոց, ես հույս ունեմ ճիշտ կհասկացվեմ՝ այդտեղ էլ Հայաստանը շահագրգռություն ունի», - հայտարարեց Հայաստանի վարչապետը:
Նա ասաց, թե իրենց մեղադրում են ու ասում՝ «միջանցք են տալիս, Սյունիք են տալիս»:
«Ժողովուրդ ջան, եթե Հայաստանում, կներեք, տենց տվող կառավարություն լիներ, կրակոցները չէին հնչի, ի՞նչ իմաստ կունենային այդ կրակոցները: Մենք ամեն հնարավոր ձևերով փորձում ենք Հայաստանի շահը պաշտպանել ու դրա համար հարվածներ ենք ստանում, հնարավոր է, էլի կստանանք», - ասաց վարչապետը:
English
Русский
