Գեներալ-լեյտենանտ Արտակ Դավթյանի շնորհավորական խոսքը Արցախի Հանրապետության ՊԲ-ի կազմավորման օրվա առթիվ

Սամվել Ասատրյանն իր ֆեյսբուքյան էջում գրել է.

ՀՀ ԶՈւ գլխավոր շտաբի պետ, գեներալ-լեյտենանտ Արտակ Դավթյանի շնորհավորական խոսքը Արցախի Հանրապետության ՊԲ-ի կազմավորման օրվա առթիվ

Այս օրը յուրահատուկ է հայ ժողովրդի համար՝ նշում ենք Հայրենական մեծ պատերազմում խորհրդային ժողովուրդների, այդ թվում՝ հայերի հաղթանակի 75 ամյակը, Շուշիի ազատագրման և Արցախի պաշտպանության բանակի կազմավորման տոները:
Արցախի պաշտպանության բանակի ստեղծումը մեր նորագույն պատմության, մեր նորանկախ պետության կարևորագույն էջերից մեկն է: Այն սկիզբ առավ կամավորական նվիրյալ հայորդիների պայքարով և հաղթական ընթացքի մեջ մտավ Շուշիի ազատագրմամբ: Փայլուն մտածված և իրագործված «Հարսանիք լեռներում» օպերացիան բեկումնային դարձավ Արցախյան ազատամարտի ողջ ընթացքի համար. հայ զինվորն ու հրամանատարը, մեջքմեջքի, միասնաբար գործեցին ու ցույց տվեցին, թե ինչ ասել է հայի ոգի ու հայի ուժ, թե ինչի է ընդունակ հայրենի հողի համար կռվի ելած հայ մարտիկը: Միաժամանակ 4 ուղղություններով իրականացված գործողությունները պսակվեցին հաջողությամբ, և մայիսի 9-ի լուսաբացին արդեն կիսավեր, բայց ազատագրված Սբ. Ղազանչեցոց եկեղեցում հնչեց Տերունական աղոթքն ու եկեղեցու գմբեթից ծածանվեց Հայոց հաղթական եռագույնը՝ ճանապարհ հարթելով դեպի երանելի խաղաղություն:
Շնորհավորում եմ Արցախյան ազատամարտի բոլոր մասնակիցներին, Պաշտպանության բանակի ծառայող և զորացրված զինծառայողներին, խոնարհվում եմ զոհված տղաների հիշատակի առաջ, շնորհակալություն եմ հայտնում բոլոր հերոսներին, նրանց հարազատներին այս հաղթանակի համար, որը մեզ հնարավորություն տվեց ազատագրելու Արցախը և կազմավորելու Արցախի պաշտպանության բանակը:
Սա հիրավի համազգային տոն է, հային իր արժանապատվությունը, իր ուժը վերադարձրած տոն, այս օրը բոլորինս է՝ պատերազմի մասնակցից մինչև այսօր սահմանին կանգնած զինվոր, բանվորից մինչև բարձր պաշտոնյա:
Հա´յ ժողովուրդ, շնորհավոր քո հաղթանակների տոնը, թող որ սուրդ միշտ փառքով դնես պատյան: