Արցախյան պատերազմում զոհված զինծառայողի մոր խոսքերը որդու կորստի և այսօրվա դրության մասին

Մեզ են դիմել Արցախյան պատերազմում զոհված զինծառայող Սիփան Սողոմոնյանի հարազատները և կիսվել Սիփանի մոր՝ Կարինե Մարյանյանի մտքերով՝ որդու կորստի և այսօրվա քաոսային դրության մասին։ Նամակն ամբողջությամբ ներկայացնում ենք ստորև.

«Իմ Սիփ, իմ աշխարհ, իմ ամենամեծ նվեր և հպարտություն։ Դու հաղթել ես, քո նման հաղթել են բոլոր քո ընկերները, մեր բոլոր տղաները։

Այսօր ինձ նման շատ մայրեր են համարում իրենց կյանքն անիմաստ՝ առանց ձեզ, որովհետև մենք հանուն հողի կորցրեցինք մեր ցանած, խնամած և հասունացրած ծիլերը, մեր կյանքում ամենաթանկը՝ ձեր կյանքը և մի ակնթարթում մնացինք ձեռնունայն։ Դուք հեռացաք, մի ամբողջ սերունդ, մի ամբողջ աշխարհ, յուրաքանչյուրդ մի տան ճրագ, մի բարձունք, մի ամբողջ երկրի հող ու հայրենիք, մի մոր անցյալ, ներկա և ապագա, որն այդպես էլ չի գալու։

Իսկ այսօր շատերն անարգում են ձեր վառ հիշատակը, չեն գնահատում ձեր ներդրումը հայրենիքի պաշտպանության սուրբ գործում։ Մեր որդիների արյունը ջուր չի դարձել, մեր որդիների արյունը դեռ չի ցամաքել Արցախի հողում։ Իսկ այսօր մեր ցավն ու վիշտը չգնահատողները պարզապես արժանի չեն մեր տղաների թափված և ոչ մի կաթիլ արյանը։
Հպարտ եմ, պատիվ ունեմ»։