Արցախի Հանրապետությունում՝ Մեսրոպ Մաշտոց Համալսարանում մեկնարկել է Սոցիալական աշխատանքի մագիստրոսական ծրագիրը

iPress.am Արցախի Հանրապետությունում սոցիալական պաշտպանության համակարգի տեսանկյունից սեպտեմբերի 14-ը պատմական օր էր։ Արցախի Մեսրոպ Մաշտոց Համալսարանում պաշտոնապես մեկնարկեց սոցիալական աշխատողների ուսուցման մագիստրոսական ծրագիրը։

Արցախում սոցիալական աշխատողների անհրաժեշտությունն առավել ակնառու դարձավ հատկապես պատերազմից հետո, երբ ի թիվս այլ խնդիրների նաև սրացան սոցիալական հիմնախնդիրները։ Ըստ այդմ, սա շատ կարևոր քայլ է Արցախում դեպի պրոֆեսիոնալ սոցիալական ծառությունների ձևավորումը։

Արդեն 1,5 տարի անց, Արցախում սոցիալական ոլորտ մուտք կգործեն սոցիալական աշխատողի կրթությամբ առաջին մասնագետներ, ովքեր նշանակալի ներդրում կբերեն Արցախում սոցիալական պաշտպանության ոլորտի քաղաքականության մշակման, սոցիալական ծառայությունների կառավարման, նոր ծառայությունների ձևավորման տեսանկյունից։

Ծրագրի մեկնարկի արարողությանը մասնակցում էին ԱՀ պետական նախարար Արտակ Բեգլարյանը, ԱՀ Աշխատանքի, սոցիալական և միգրացիայի հարցերի նախարար Արմինե Պետրոսյանը, ԱՀ ԿԳՄՍ նախարարի տեղակալ Հասմիկ Մինասյանը, Հայաստանի սոցիալական աշխատողների ասոցիացիայի նախագահ Միրա Անտոնյանը, Հայ կրթական հիմնարկության ներկայացուցիչ Վաչե Վարդանյանը, Մեսրոպ Մաշտող համալսարանի ներկայացուցիչներ և իհարկե սոցիալական աշխատանք մասնագիտությամբ մագիստրոսական ծրագրի ուսանողների առաջին խումբը։

ԱՀ պետական նախարար Արտակ Բեգլարյանը շնորհավորեց սոցիալական աշխատանք մասնագիտությամբ մագիստրոսական ծրագրի ուսանողների առաջին խմբին և իր ողջույնի խոսքում նշեց․ «Այս Ծրագրի շնորհիվ Դուք կկարողանաք ոչ միայն սոցիալական աշխատանք իրականացնել, այլ նաև դառնալ քաղաքականություն մշակողներ։

Շնորհակալ եմ բոլոր կողմերին, հատկապես տիկին Անտոնյանին և իր գլխավորությամբ Հայաստանի սոցիալական աշխատողների ասոցացիային այս նախաձեռնության և այն առաջ մղելու համար, ինչպես նաև շնորհակալ ենք Մեսրոպ Մաշտոց համալասարանի ղեկավարությանը»։

«Մեր հասարակությունում ցանկացած մեկի մասնակցությունը շատ կարևոր է, որպեսզի կարողանանք առաջացած հետպատերազմյան խնդիրներին ճիշտ լուծումներ տանք։ Դուք պետք է հոգի դնեք, միայն հոգի դնելով կկարողանաք խնդիրը ամբողջությամբ հասկանալ և ճիշտ լուծումներ առաջարկել, ուստի այս բարդ աշխատանքում ձեզ հաջողություն ենք մաղթում և շնորհակալություն, որ ստանձնեցիք այս բարդ գործը»,- իր շնորհակալական խոսքում նշեց ԱՀ Աշխատանքի, սոցիալական և միգրացիայի հարցերի նախարար Արմինե Պետրոսյանը։

« Այսօր մեր պետությունը կանգնած է բարդ քաղաքական և սոցիալական վիճակում, բայց ես ուզում եմ նշել կրթության կարևորագույն դերը այս իրավիճակից դուրս գալու գործում և ես կոչ եմ անում ուսանողներին ամենայն լրջությամբ վերաբերել այս հնարավորությանը։»,- իր խոսքում նշեց ԱՀ ԿԳՄՍ նախարարի տեղակալ Հասմիկ Մինասյանը։

«Հայ կրթական հիմնարկությունը պատերազմից առաջ և պատերազմից հետո ավելի մեծ ուժերով Արցախի կողքին է ու նաև կուզեմ, որ ցանկացած ուսանող իմանա, որ այն կրթաթոշակները, որոնք որ հատկացնում ենք շատ դժվարությամբ ենք ձեռք բերել և սա շեշտում եմ, որպեսզի էլ ավելի պատասխանատու լինեք ձեր աշխատանքում»,- կրկին շնորհավորելով ուսանողներին ելույթ ունեցավ Հայ կրթական հիմնարկության Արցախի ներկայացուցիչ Վաչե Վարդանյանը։ Եզրափակելով և ամփոփելով մեկնարկը Հայաստանի սոցիալական աշխատողների ասոցիացիայի նախագահ Միրա Անտոնյանը նշեց․ « Արցախի Հանրապետությունում սոցիալական աշխատանքի հիմնարար կրթություն ունենալու գաղափարը շատ ավելի վաղ էր մեզ մոտ ծագել և հենց այստեղ սոցիալական ինստիտուտները պետք է զարգանան, պետք է կայանան։

Ուզում եմ հպարտանանք, որ ունենք այս հնարավորությունը, ամեն տարի ունենանք նոր ուսանողներ և մեր երկիրը ունենա պրոֆեսիոնալ մասնագետներ»։ Միջոցառման ավարտին Մեսրոպ Մաշտոց համալսարան ընդունված 20 ուսանողներ ստացան ուսանողական տոմսեր և ստուգման գրքույկներ։