ԱՄՆ կատարում է առաջին քայլը. Բլինքենի զանգը Երևան

1in.am- Հայաստանի վարչապետ Նիկոլ Փաշինյանը մարտի 14-ին հեռախոսազրույց է ունեցել ԱՄՆ պետքարտուղար Էնթոնի Բլինքենի հետ: Հեռախոսազրույցի ընթացքում Նիկոլ Փաշինյանն ու պետքարտուղար Բլինքենը խոսել են հարցերի լայն շրջանակի մասին: Զրուցակիցներն անդրադարձել են հայ-ամերիկյան հարաբերությունների օրակարգային հարցերին և կարևորել ռազմավարական երկխոսության շարունակականության ապահովումը՝ տարբեր ոլորտներում երկկողմ փոխգործակցության զարգացման ու ամրապնդման նպատակով:

Ըստ հաղորդագրության, Նիկոլ Փաշինյանը և Էնթոնի Բլինքենն անդրադարձել են Հարավային Կովկասում տեղի ունեցող գործընթացներին, Լեռնային Ղարաբաղի շուրջ իրավիճակին և լարվածության աճին: Կողմերը կարևորել են տարածաշրջանում կայունության և խաղաղության ապահովումը՝ ընդգծելով ԵԱՀԿ Մինսկի խմբի համանախագահության շրջանակում Լեռնային Ղարաբաղի հիմնախնդրի համապարփակ կարգավորման անհրաժեշտությունը, ինչը կնպաստի Հայաստանի և Ադրբեջանի միջև խաղաղության հաստատմանը:

ԱՄՆ պետքարտուղարի Երևան զանգը անկասկած առանձնահատուկ ուշադրության է արժանի հենց այդ թեմայի համատեքստում, հաշվի առնելով և այն, որ հեռախոսազանգը տեղի է ունենում այն բանից հետո, երբ Երևանը պաշտոնապես հայտարարեց Ադրբեջանի հետ խաղաղության պայմանագրի շուրջ բանակցություն կազմակերպելու առաջարկով ԵԱՀԿ ՄԽ համանախագահներին դիմելու մասին: Իհարկե դա ամենևին չի նշանակում, թե ԱՄՆ պետքարտուղարի զանգը պայմանավորված էր հենց դրանով, սակայն բանն այն է, որ Երևանի դիմումը մեծ հաշվով կարող է պարունակել ռեգիոնալ քաղաքական գործընթացների «ռեսթարտի» ներուժ, ընդ որում ավելի լայն աշխարհաքաղաքական համատեքստով: Այդ իմաստով իհարկե հետաքրքիր է այն, թե ինչ կարծիք է արտահայտել Երևանի դիմումի առնչությամբ ԱՄՆ պետքարտուղարը և արդյո՞ք Հայաստանի վարչապետի հետ հեռախոսազրույցը դե ֆակտո հնարավոր կլինի համարել առաջին քայլն այդ ուղղությամբ, իհարկե պայմանական իմաստով, որի շրջանակում քննարկվել են մանրամասներ, որոնց շարունակությունն էլ իր հերթին կարող է լինել թերևս Իլհամ Ալիևի հետ հեռախոսազրույցի տեսքով: