Ադրբեջանում հայտնել են Արցախում «ռազմական գործողություն» սկսելու և այն շուտով իր վերահսկողության տակ վերցնելու մասին

Ադրբեջանի Ժողովրդավարության և մարդու իրավունքների ինստիտուտի ղեկավար Ահմեդ Շահիդովը թուրքական Ulusal հեռուստաընկերության եթերում հայտարարել է, թե իբր Ադրբեջանն Արցախում սկսել է «ահաբեկչության դեմ ռազմական գործողություն»: Ըստ Շահիդովի` «նպատակն այնտեղ գտնվող հայ զինված խմբավորումների վերացումն է», հայերին անվանել է «ադրբեջանցիներին սպանած ահաբեկիչներ»:

Ադրբեջանցի պաշտոնյան նաև հայտնել է, որ արդեն երկու օր է, ինչ ռուս խաղաղապահներն իբր սկսել են հեռանալ Արցախից` դա կապելով փետրվարի 23-ին կնքված ռուս-ադրբեջանական դաշնակցային հռչակագրի հետ:

Նա նաև նշել է, որ Արցախում տեղակայված խաղաղապահները ռուսական բանակի էլիտար ստորաբաժանումներն են, և նրանց ուղարկելու են Ուկրաինա` պատերազմելու:

«Խոջալուում տեղակայված ռուս խաղաղապահների մի մասը, ոչ պաշտոնական տվյալներով, արդեն հեռացել է Հայաստան»,- նշել է Շահիդովը:

Նա բարբաջել է նաև, թե «արդեն եկել է ժամանակը, որ Ստեփանակերտը, Մարտունին և Խոջալուն անցնեն Ադրբեջանի վերահսկողության տակ, և մոտակա ժամանակներում այդ շրջանների ադրբեջանցի բնակիչները վերադառնալու են»:

Նշենք, որ վերջին օրերին Ադրբեջանը կեղծ տեղեկություններ է տարածում, թե ռուսական զորքերը լքում են Արցախը: Արցախի ԱԽ-ն հայտարարել է, որ նման տեղեկությունները սուտ են:

Նյութը` Yerkir.am-ի