Գեղարքունիքի մարզի Գեղամասար համայնքի Կութ գյուղում երեկ տեղի ունեցած միջադեպից հետո 81 անասուն կրակահերթի պատճառով փախել էին դեպի ադրբեջանական կողմ։
Իրավաբան․net-ի հետ զրույցում Կութ բնակավայրի վարչական ղեկավար Սիմա Չիտչյանն ասաց, որ 81 անասունից 1-ը փախել, եկել է հայկական կողմ, իսկ 80-ը շարունակում են մնալ ադրբեջանական կողմում։
«Հիմա փոխմարզպետի զանգին եմ սպասում։ Էս պահին ուրիշ բան չկա, տարել են մեր անասունները, ոչ մի արձագանք, ոչ մի բան չկա, թե ի՞նչ եղավ, հանդիպում ունեցա՞ն, թե՝ չէ, ոչ մի բան։ Կորպուսի հրամանատարն էլ բարձրացել է ընդեղ, բայց դեռ ոչ մի բան չեն ասում»,- նշեց նա։
Հիշեցնքնք, որ հունիսի 5-ին ՀՀ պաշտպանության նախարարությունը հայտարարություն էր տարածել, որում ասվում էր․
«Հունիսի 5-ին հերթական միջադեպն է գրանցվել հայ-ադրբեջանական սահմանին: Գեղարքունիքի մարզի Կութ գյուղի հովվի անասունների մի մասը, գյուղի հարակից տարածքներում արածելու ընթացքում, շարժվել է դեպի ադրբեջանցի զինվորականների դիրքեր: Երբ հովիվը, անասուններին ետ բերելու նպատակով, փորձել է մոտենալ ադրբեջանցի զինծառայողներին, նրա ուղղությամբ կրակ է բացվել:
Հայկական ԶՈւ ստորաբաժանման զինծառայողներն անմիջապես մոտեցել են միջադեպի տարածք, ինչին ի պատասխան ադրբեջանցի զինծառայողները կրկին կրակ են բացել: Հայկական կողմի պատասխան գործողություններից հետո կրակը դադարեցվել է, իսկ անասունների մեծ մասին հաջողվել է վերադարձնել: Կրակոցների հետևանքով տուժողներ չկան»:
Ավելի վաղ հայտնել էինք, որ մամուլում տեղեկություններ էին տարածվում, որ Գեղարքունիքի մարզի սահմանապահ Կութ գյուղում տեղի է ունեցել միջադեպ։ Ադրբեջանցի զինվորները կրակել են գյուղի հովվի վրա։
English
Русский
