Մարինե Առուշանյանը 37 տարեկան է՝ 8 զավակների մայր։ Ամենամեծը 16 տարեկան է, ամենափոքրը՝ 1 ամսական, որ ծնվել է Արցախից տեղահանվելու ճանապարհին։ Փոքրիկ Էվան նախատեսվածից շուտ է լույս աշխարհ եկել։
Տիկին Մարինեն ասում է՝ մենք պատերազմում շատ կորուստներ ունեցանք, և պիտի շատ լինեն ծնունդները, պիտի ծնունդներով հավասարակշռենք մեր կորուստները։
Մարինե Առուշանյանը Մարտակերտի շրջանի Վանք գյուղից է տեղահանվել։ Սկզբում Վայքում, ապա Շիրակի մարզի Թորոս գյուղում են ապաստանել, իսկ բոլորովին վերջերս տեղափոխվել են Գյումրի։
«Ես բազմազավակ մայր եմ, 8-րդ երեխայիս ունեցել եմ ճանապարհին, երբ որ մենք պիտի Հայաստան գայինք։ Ես վախեցել էի, երբ հասանք Հակարիի կամուրջը... 36 շաբաթական է երեխաս ծնվել, փոքր, գունատ։ Երկու անգամ վատացել եմ, ինձ արհեստական շնչառություն են տվել, որ երեխայիս ունեցել եմ»,- Oragir.News-ի հետ զրույցում պատմում է արցախցի կինը։
Տիկին Մարինեն ասում է՝ երբ սեպտեմբերի 19-ին պատերազմը սկսվեց, մտածել է, որ ժամեր հետո նորից կվերադառնան իրենց առօրյային, որովհետև ո՛չ առաջին դեպքն էր, ո՛չ էլ վերջինը. «Էս մի պատերազմը ուրիշ էր, էս մի պատերազմը զրկեց մեզ մեր հողում ապրելու իրավունքից»։
English
Русский
