«Դեպքը տեղի է ունեցել պատերազմից մոտ մեկ ժամ հետո, երբ անդադար հրթիռակոծվում էր գյուղը: Բոլորս հավաքվել էինք դպրոցի ապաստարանում, համարյա ամբողջ գյուղն այնտեղ էր։ Հնարավոր չէր գյուղից դուրս գալ, որովհետև կրակում էին ինչով ասես»,- MediaHub-ին պատմում է Ասկերանի շրջանի Շոշ գյուղի 15-ամյա բնակիչ Գոռ Գարաքյանը։
Սեպտեմբերի 19-ին իր համագյուղացիների հետ նա դպրոցի բակում էր, երբ ադրբեջանական կողմը թիրախավորված հարվածով կրակել է դպրոցի ուղղությամբ։ Տեղում 4 հոգի վիրավորում է ստացել, այդ թվում և Գոռ Գարաքյանը։
«Հրթիռակոծությունից հետո արյուն էր հոսում, 4 բեկոր մարմնիս մեջ էր։ Բոլոր վիրավորներին իջեցրել են ապաստարան և տեղում առաջին օգնություն ցուցաբերել։ Քանի որ գյուղն արդեն պաշարված էր, ուստի Ստեփանակերտ գնալն անհնարին էր դարձել։ Բոլոր վիրավորներն ու ընդհանրապես ամբողջ բնակչությունը օգնության կարիք ուներ»,- պատմում է մեր զրուցակիցը։
Երեկոյան, երբ համայնքի ղեկավարը կազմակերպում է Շոշի տարհանման գործընթացը, առաջինն օգնում են վիրավորում ստացած 4 խաղաղ բնակչին։ Գոռն ասում է, որ Ստեփանակերտի հիվանդանոցում իրենց անհրաժեշտ բուժօգնություն է ցուցաբերվել, այնուհետև Հայաստան տեղահանվելուց հետո, այստեղ ստուգվել է։
«Կարևորը մարմնիս մեջ բեկոր չկա, մնացածը ժամանակի հարց է»,- ասաց նա։
Հիշեցնենք, որ սեպտեմբերի 19-ի կեսօրին Արցախի դեմ սկսված ռազմական ագրեսիայի ժամանակ, նույն օրը ուշ երեկոյան Շոշն անցել է թշնամու վերահսկողության տակ։ Բնակիչները տարհանվել են հանկարծակի, երբ ադրբեջանական զորքն արդեն հասել էր գյուղի արվարձաններ։
English
Русский
