Բելառուսի Նախագահ Ալեքսանդր Լուկաշենկոն նշել է Եվրասիական տնտեսական միությունում բազմաթիվ խնդիրների առկայությունը, որոնք, առաջին հերթին, կապված են ավելի վաղ ձեռք բերված պայմանավորվածությունները չկատարելու հետ: Այս մասին նա հայտարարել է այսօր ՀՀ վարչապետ Նիկոլ Փաշինյանի հետ հանդիպմանը, փոխանցում է ԲԵԼՏԱ-ի թղթակիցը։
«Ինչ մեղքս թաքցնեմ, ԵԱՏՄ-ում բազմաթիվ խնդիրներ կան կապված այն բանի հետ, որ մենք չենք կատարել այն, ինչի շուրջ պայմնանավորվել էինք: Մենք դեռ բավականաչափ խոչընդոտներ ունենք, մեր միջպետական սահմանները խոչընդոտների հետ կապված այնպիսի վիճակում են, որ բիզնեսը հաճախ ասում է. սահմաններ գծեք պետությունների միջեւ, մեզ ավելի հեշտ կլինի: Արդեն նույնիսկ բիզնեսն է դրա մասին հայտարարում: Թվում է՝ սահմաններ չկան եւ սահմանին լարվածությունը չափազանց մեծ է: Դուք դա ինձանից լավ եք զգում: Ուստի անելիքներ կան: Բայց ես շատ կցանկանայի, որպեսզի վարչապետների հանդիպումը խթան հաղորդի այդ խնդիրների լուծմանը»,- ասել է պետության ղեկավարը:
Միեւնույն ժամանակ, Ալեքսանդր Լուկաշենկոն նշել է, որ Եվրասիական միջկառավարական խորհուրդը հարաբերությունների խորացման հստակ քայլ է ԵԱՏՄ տարածքում: «Համենայն դեպս, ես կցանկանայի, որ այդպես լիներ: Բայց կարծիքների փոխանակումը շատ լուրջ էր: Որքանով ինձ տեղեկացրին, դուք այդ հանդիպման շարժիչն եք եղել այնտեղ»,- նշել է Բելառուսի առաջնորդը՝ դիմելով Նիկոլ Փաշինյանին:
Նախագահն արձանագրել է, որ Բելառուսն եւ Հայաստանը հիմնականում նույն խնդիրներն ունեն Եվրասիական տնտեսական միությունում, նմանատիպ տնտեսություններ: «Մենք ապավինում ենք տնտեսության իրական հատվածին, մեր մյուս գործընկերների պես մեծ պաշարներ չունենք: Միգուցե նաեւ ղրղզներն են նույն վիճակում, չնայած, հնարավոր է, նրանց որոշ չափով ավելի հեշտ է: Մենք ածխաջրածնի այդպիսի պաշարներ չունենք: Եվ մեզ ավելի դժվար է: Նույնիսկ գների անկման պայմաններում Ղազախստանն ու Ռուսաստանը մեծ հնարավորություններ ունեն: Մենք այդ հնարավորությունները չունենք»,- ասել է Ալեքսանդր Լուկաշենկոն:
«Խնդիրները Եվրասիական տնտեսական միության զարգացման գործում հնարավոր կլինի լուծել, եթե լինի մասնակից երկրների ղեկավարության քաղաքական կամքը: Մենք երկար ժամանակ է չենք հանդիպել կորոնավիրուսի պատճառով։ Հուսով եմ, որ այժմ մեր աշխատանքը կվերադառնա նորմալ հունի, եւ մենք կանոնավոր կերպով կհանդիպենք»,- ասել է Նիկոլ Փաշինյանը:
Ըստ նրա՝ այսօր Մինսկում կայացած ԵԱՏՄ միջկառավարական խորհրդի նիստը «շատ արդյունավետ էր»: Կողմերին հաջողվել է համաձայնեցնել հիմնական մոտեցումները եւ առաջ շարժվել խոչընդոտները վերացնելու ուղղությամբ: Ըստ նրա՝ կարելի է խոսել ԵԱՏՄ տարածքում առկա 10 խոչընդոտներից 8-ի վերացման մասին: Բացի այդ, քննարկվել են ԵԱՏՄ-ի ձեռնարկությունների եւ կազմակերպությունների՝ պետական մրցույթներին մասնակցությանն առնչվող հարցեր: «Մենք նույնպես լավ որոշման ենք հանգել: Վստահ եմ, որ այսօրվա հանդիպման արդյունքում այդ հարցը կլուծվի»,- ասել է վարչապետը:
Նա վստահություն է հայտնել, որ ապագայում ԵԱՏՄ երկրները կշարունակեն մերձեցման եւ խոչընդոտների վերացման գործընթացը տարբեր մակարդակներում: «Կարծում եմ, եթե մենք կարողանանք պահպանել քաղաքական կամքը ներկայիս մակարդակում, բոլոր հարցերը կլուծվեն: Պարզապես հարկավոր է աշխատել այդ ուղղությամբ»,- ասել է Նիկոլ Փաշինյանը: