Տեսանյութ. Ուսուցիչների դասաժամերը չի ավելանալու, բայց դասավանդման մեխանիզմը փոխվելու է․ փոխքաղաքապետ

«Զավեշտալի բամբասանքների շարքից է,- «Առաջին լրատվական»-ի հետ զրույցում ասաց Երևանի փոխքաղաքապետ Տիգրան Վիրաբյանը՝ անդրադառնալով շրջանառվող լուրերին այն մասին, թե Երևանի քաղաքապետն արձակուրդից հետո չի վերադառնալու իր պաշտոնին: «Քաղաքապետը ստացել է երևանցիների քվեն և մանդատը, նրան պատվիրակել են կառավարել Երևանը հինգ տարի, և Երևանի քաղաքապետը բոլոր նախագծվող ծրագրերի իրականացումը հնգամյա ժամկետում է պատկերացնում»,- նշեց Տիգրան Վիրաբյանը՝ հավելելով՝ մեր իմունիտետը բավականին բարձր է:

Փոխքաղաքապետի դիտարկմամբ՝ կադրային փոփոխությունները բնականոն երևույթ են. «Քաղաքապետարանն աշխատող օրգանիզմ է, և թարմ արյուն ներարկելու անհրաժեշտություն միշտ է լինում»: Տիգրան Վիրաբյանը նաև հավելեց, որ իր պաշտոնից ազատման դիմում է գրել Երևանի քաղաքապետարանի հանրակրթության վարչության պետ Աննա Ստեփանյանը:

Անդրադառնալով Արթուր Մեսչյանի հրաժարականին, մեր զրուցակիցը նշեց, որ երբ նա նշանակվել է Երևանի գլխավոր ճարտարապետ, իր ասուլիսներից մեկում նշել է, որ կպաշտոնավարի 2 տարի. «Ոպես լեգենդար Արթուր Մեսչյան, չէր կարող իր խոսքի տերը չլինել, և իր խոստացած ժամանակահատվածում լքեց մեր շարքերը, ինչը դժվար է մեզ համար, քանի որ նա ոչ միայն լավ մասնագետ է, այլ նաև լավ խորհրդատու և լավ ընկեր»:

Սեպտեմբերից ուսումնական հաստատություններում կվերսկսվեն դասերը՝ պահպանելով պարետի ցուցումները. «Նախատեսված ուղեցույցին հետևելը ամենաշատը Երևանում դժվար կլինի, քանի որ Երևանի դպրոցներում աշակերտների թիվը մեծ է. փորձել ենք գտնել այն բոլոր ճանապարհները, որոնցով հնարավոր կլինի անվտանգության նորմերը պահպանելով՝ կազմակեպել դասապրոցեսը»: Փոխքաղաքապետը նաև հավելեց, որ ուսուցիչների դասաժամերը չեն ավելանալու, փոխվելու է դասավանդման մեխանիզմը:

Տիգրան Վիրաբյանն անդրադարձավ նաև «Մխիթար Սեբաստացի» կրթահամալիրի հետ կապված խնդիրներին: