«Վարորդները գումար չեն վերցնելու և մանրը չեն վերադարձնելու»․ Ինչպես է քաղաքապետարանը բարեփոխում տրանսպորտային համակարգը

«Վարորդները գումար չեն վերցնելու և մանրը չեն վերադարձնելու»․ Ինչպես է քաղաքապետարանը բարեփոխում տրանսպորտային համակարգը:

Քաղաքապետարանի մամուլի խոսնակ Հայկ Կոստանյանը ֆեյսբուքյան գրառմամբ երևանցիներին տեղեկացրել է՝ տրանսպորտային համակարգի բերեփոխումները շարունակվում են, նոր պարտադիր պայմաններ կան, որոնք պիտի գործեն նոյեմբերի 1-ից։

Կոստանյանը, մասնավորապես, գրել է․

«Սիրելի՛ երևանցիներ, հարգելի՛ գործընկերներ,

մայրաքաղաքի տրանսպորտային համակարգի բերեփոխումների և միասնական տոմսային համակարգի ներդրման համատեքստում տեղեկացնում եմ, որ նոյեմբերի 1-ից հասարակական տրանսպորտից, մասնավորապես՝ MAN, ZhongTong և GazelCity մակնիշի փոխադրամիջոցներից օգտվելիս պարտադիր պայման է լինելու 100 դրամանոց մետաղադրամի առկայությունը, կամ ավտոբուսներում տեղադրված վճարային համակարգով QR կոդի միջոցով վճարում իրականացնելը։

Նպատակը նախևառաջ հնարավոր ստվերային շրջանառությունը կանխելն է, այդպիսով՝ վարորդներին իրենց հիմնական գործից չշեղելը, ինչպես նաև հունվարի 1-ից սպասվող միասնական տոմսային համակարգին անցում կատարելուն նախապատրաստվելը։

Ըստ այդմ՝ վարորդները ուղևորներից առձեռն գումար չեն վերցնելու և մանրը չեն վերադարձնելու։

Ուզում եմ տեղեկացնել նաև, որ վերջին 4 ամիսների ընթացքում «Երևանի ավտոբուս» ՓԲԸ հասույթը կազմել է երկու միլիարդ ութ հարյուր տասնյոթ միլիոն ՀՀ դրամ, ինչը դրան նախորդող 4 ամիսների համեմատ ավելացել է 3․9%:

Միայն այս տարվա սեպտեմբեր ամսվա աշխատանքային օրերին հավաքագրվող հասույթը օրական կազմել է 30-32 միլիոն ՀՀ դրամ»։