Սիրիական ավիաընկերության ինքնաթիռն անհետացել է ռադարներից. Ինչ է կատարվել

Սիրիական Syrian Air ավիաընկերության Իլ-76 օդանավը, որը ռադարների վրա հայտնվել է Դամասկոսի տարածքում տեղական ժամանակով մոտավորապես ժամը 2:00-ին, անհետացել է ռադարներից մոտ 40 րոպե թռիչքից հետո՝ Հոմս քաղաքի մոտակայքում, նրա գտնվելու վայրը դեռևս անհայտ է, հայտնում է Flightradar24 պորտալը, փոխանցում է «ՌԻԱ Նովոստի»-ն:

Ինչպես հայտնում է Flightradar24-ը, սիրիական Իլ-76 ինքնաթիռը՝ YK-ATA գրանցման համարով, ռադարներից անհետացել է Ռամ ալ-Անզ բնակավայրի վրայով թռնելիս, երբ գտնվել է ծովի մակարդակից 495 մետր բարձրության վրա։ Պորտալի տվյալներով՝ այն շարժվում էր ծայրահեղ ցածր արագությամբ, որով նման տիպի ինքնաթիռը չի կարող թռնել։

Ինքնաթիռը ռադարների վրա չի հայտնվել 2.40-ից (Մոսկվայի ժամանակով 5.40-ից): Նրա մեկնման վայրը և նպատակակետն անհայտ են, ինչպես նաև հայտնի չէ, թե ով կարող է լինել օդանավում:

Ավելի վաղ Reuters-ը, վկայակոչելով սիրիական բանակի անանուն բարձրաստիճան սպաներին, պնդում է, որ Սիրիայի նախագահ Բաշար ալ-Ասադը, իբր, լքել է մայրաքաղաք Դամասկոսը և թռել «անհայտ ուղղությամբ»՝ երկրում ռազմական գործողությունների ֆոնին: