Ռուսաստանը պատրաստվում է հարձակվել եւս երկու երկրների վրա

Ռուսաստանն իր զավթողական հավակնություններով կանգ չի առնի Ուկրաինայում։ Ուստի մյուս երկրներն արդեն պետք է պատրաստվեն Պուտինի առաջիկա հարձակմանը, ասել է Ուկրաինայի Ազգային անվտանգության եւ պաշտպանության խորհրդի քարտուղար Ալեքսեյ Դանիլովը։ ISLND հեռուստաընկերությանը տված հարցազրույցում նա ասել է, որ նման եզրակացության է հանգել ՌԴ ԱԳ նախարար Սերգեյ Լավրովի հերթական հայտարարությունից հետո։

Մասնավորապես, ինչպես նշել է Դանիլովը, խոսքը Մոլդովայի եւ Ղազախստանի մասին է։ «Լավրովն օրերս ասաց, որ ղազախներն ու մոլդովացիները եղբայրներ են, պատրաստվեք, եղբայր ղազախներ և եղբայր մոլդովացիներ», ասել է Դանիլովը։ Ռուսաստանը ներկայում լարում է իրավիճակն իր վերահսկողության տակ գտնվող Մոլդովայի Պրիդնեստրովիեում, ըստ հետախուզությունների տեղեկությունների՝ Մոսկվան նպատակ ունի այն վերածել Մոլդովայի եւ Ուկրաինայի դեմ հարձակման պլացդարմի։

Ինչ վերաբերում է Ղազախստանին, այդ երկրում տեղի ունեցած իրադարձություններից հետո ՌԴ-ն ստիպված էր հանել զորքը Չինաստանի ու Թուրքիայի պահանջով, թեեւ ռուսական քարոզչական մեքենան չի թաքցնում ՌԴ տարածքային հավակնությունները Ղազախստանի հանդեպ։ Աստանան վարում է ինքնուրույն քաղաքականություն, չեղարկել է մայիսի 9-ի տոնակատարությունները եւ հայտարարել է, որ չի օգնի ՌԴ-ին՝ շրջանցել պատժամիջոցները։

Դանիլովի ակնարկը հասկանալի է․ Մոսկվան եթե որեւէ ժողովրդի համարում է եղբայրական՝ հարձակվում է նրա վրա։ «Ամենաեղբայրական» հայերի դեմ հարձակումը 2020-ի սեպտեմբերին ոչ մեկի մոտ կասկած չի թողել։